«Ноч расстраляных паэтаў» у Батумі (фота)
«Ноч расстраляных паэтаў» сёння праходзіць у больш як 30 гарадах свету. Беларусі грузінскага Батумі таксама сабраліся, каб адзначыць трагічную дату ля будынка мясцовага драматычнага тэатра.
Месца правядзення акцыі сімвалічнае: тэатр носіць імя Іллі Чаўчавадзэ — выбітнага грузінскага паэта і грамадскага дзеяча, змагара за незалежнасць сваёй краіны. У 1907 годзе Чаўчавадзэ быў забіты, паводле найбольш распаўсюджанай версіі, бальшавікамі.
Імпрэза пачалася з сумеснага выканання «Пагоні».
«Давайце ўзгадаем нашых герояў, хто змагаўся, хто марыў пра Беларусь», — прапанавала вядучая акцыі Аліна Стэфановіч, жонка палітвязня, праваабаронца «Вясны» Валянціна Стэфановіча.
Яе сын Адам прачытаў верш Анатоля Сыса «Адпусціце мяне, Курапаты».
Па завядзёнцы, закладзенай яшчэ на мінскіх Курапатах, зачыталі імёны тых, чые жыцці абарваліся ў тую чорную ноч з 29 на 30 кастрычніка 1937 года. Сярод іх прагучалі і імёны тых, хто загінуў у апошні год: Генадзь Шутаў, Раман Бандарэнка, Андрэй Зельцэр...
Варлам Рамішвілі, грузінскі палітык, прафесар, распавёў, што было ў Грузіі ў 30-я гады.
«Вы, беларусы, носіце сцяг "Пагоні", паўсталі супраць расійскай акупацыі. Пасля гэтага рускія хацелі выкараніць вас. Гэтыя людзі, чые тут партрэты, хацелі, каб вы жылі. Я ганаруся, што зараз у Батумі бачу сапраўдных беларусаў. Жыве Беларусь, жыве вечна!» — прамовіў ён.
«Сёння мы будзем чытаць вершы, і такім чынам з’яднаемся з тымі, каго ад нас хацелі скрасці», — зазначыла перакладчыца Наталля Харытанюк.
Яна прачытала верш Уладзіміра Жылкі і ўзгадала грузінскіх паэтаў, якія загінулі ў 1937 годзе.
Хлопец з Берасця прачытаў верш адваката і палітвязня Максіма Знака «Бульба», а таксама верш берасцейскага палітвязня Дзяніса Марусевіча.
Таксама прачыталі верш палітвязня, медыяменеджара Андрэя Аляксандрава.
У «Ночы расстраляных паэтаў» у Батумі ўзялі ўдзел каля 60 чалавек.
