Расія імкліва набывае рысы дыктатуры — The Economist

Сітуацыя з дэмакратыяй у Расіі пасля пачатку вайны ва Украіне істотна пагоршылася, краіна набывае характэрныя рысы дыктатуры. А дэмакратычныя паказчыкі РФ прадэманстравалі самае рэзкае падзенне сярод усіх краін свету.

Пра імклівы шлях Расіі да дыктатуры сведчыць штогадовае даследаванне «Індэкс дэмакратыі» групы Economist Intelligence Unit (EIU), якая з'яўляецца аналітычным падраздзяленнем брытанскага часопіса The Economist.

Паводле ацэнак аналітыкаў, толькі 45,3% насельніцтва планеты жыве ва ўмовах дэмакратыі, 36,9% (у асноўным у Расіі і Кітаі) — ва ўмовах аўтарытарнага праўлення.

Крыху менш за 8% насельніцтва жыве ва ўмовах «поўнай дэмакратыі». У апошнюю групу трапілі больш за 20 краін, у прыватнасці Канада, Швецыя і Уругвай.

«Пасля ўварвання ва Украіну дэмакратычныя паказчыкі РФ паказалі самае рэзкае падзенне сярод усіх краін свету. Расія ўжо доўгі час знаходзіцца на траекторыі адыходу ад дэмакратыі і цяпер набывае многія характэрныя рысы дыктатуры», — гаворыцца ў справаздачы аналітыкаў.

Яны адзначаюць, што расійскія ўлады пачалі ажыццяўляць беспрэцэдэнтныя рэпрэсіі супраць медыя і апазіцыі пасля таго, як Уладзімір Пуцін увёў войскі ў Украіну.

Сярод станоўчых тэндэнцый аналітыкі адзначылі пераход Чылі, Францыі і Іспаніі з катэгорыі «недасканалая дэмакратыя» ў Катэгорыю «поўная дэмакратыя». Гэта адбылося ў асноўным праз скасаванне жорсткіх каранавірусных захадаў, якія абмяжоўвалі свабоду грамадзян.

Беларусь аказалася ў гэтым рэйтынгу на 153-м месцы (са 167) — побач з намі на дне размясціліся Расія, Буркіна-Фасо, Ірак, Сальвадор і іншыя дружалюбныя нам краіны.