Медыяменеджара Канстанціна Залатых неўзабаве будуць судзіць
Канстанціну Залатых, дырэктару газеты «Белорусы и рынок», прад'явілі абвінавачванне, цяпер ён чакае суда.
Канстанцін Залатых,Фота з facebook.com
Беларуская асацыяцыя журналістаў паведаміла, што 31 студзеня, пасля больш чым васьмі месяцаў знаходжання за кратамі, Канстанцін Залатых нарэшце выслухаў сутнасць абвінавачванняў на свой адрас.
Як ужо стала звыклай беларускай завядзёнкай, адвакаты палітвязняў пад пагрозай пазбаўлення ліцэнзіі звязаныя жорсткімі ўмовамі неразгалошвання «таямніцы следства», таму ад усялякіх каментароў устрымліваюцца.
На гэты момант вядома толькі тое, што Канстанціну Залатых прад'явілі цэлы шэраг сур'ёзных крымінальных артыкулаў, на падставе аднаго з іх медыяменеджара, уласна кажучы, мінулай вясной і затрымалі, – нібыта за «распальванне варожасці». Максімальная санкцыя прадугледжвае за гэта да 10 гадоў зняволення.
Неўзабаве справу Канстанціна Залатых перададуць на азнаямленне пракурору для далейшага накіравання ў суд. Да заканчэння працэсу фігурант будзе заставацца ў мінскім СІЗА №1.
Нагадаем, што 18 траўня 2022 года супрацоўнікі Камітэта дзяржбяспекі затрымалі дырэктара найстарэйшай эканамічнай газеты краіны «Белорусы и рынок» Канстанціна Залатых, галоўнага рэдактара Андрэя Александровіча і бухгалтарку Юлію Кахно.
Пасля допыту Андрэя Александровіча і Юлію Кахно адпусцілі, а Канстанцін Залатых толькі праз некалькі дзён знайшоўся ў жодзінскім следчым ізалятары. Мяркуючы па змесце пратакола, папярэдняй прычынай надзвычайнай увагі значылася «распальванне варожасці» (арт. 130 Крымінальнага кодэкса).
На пачатку чэрвеня праваабарончая супольнасць прызнала Канстанціна Залатых палітычным зняволеным.
У жніўні медыяменеджара перавялі з Жодзіна ў СІЗА №1 Мінска, там ён утрымліваецца дагэтуль.
За «распальванне расавай, нацыянальнай, рэлігійнай ці іншай сацыяльнай варожасці» прадугледжваецца шырокі спектр пакарання — ад штрафу, што ў палітычных судах амаль не практыкуецца, да абмежавання волі (так званая «хімія») на тэрмін да 5 гадоў, або рэальнага зняволення ад 3 да 10 гадоў. І гэта толькі што тычыцца вядомага артыкула абвінавачвання, вылучанага супраць Канстанціна Залатых. Наўрад ці іншыя нашмат гуманнейшыя.
Канстанцін Залатых — дасведчаны медыйны менеджар і вытворчы адміністратар, супрацоўнічаў з вядучымі незалежнымі СМІ і буйнымі дзяржаўнымі прадпрыемствамі.
Апошнім месцам працы была газета «Белорусы и рынок» — адно з рэдкіх выданняў, якое здолела захавацца пасля хвалі масавых рэпрэсій супраць недзяржаўных рэдакцый.
23 ліпеня 2022 года доступ да сайта газеты ў Беларусі быў заблакаваны Міністэрствам інфармацыі «з прычыны распаўсюду гіперспасылак на матэрыялы, прызнаныя судом экстрэмісцкімі». А на пачатку снежня пасля 32 гадоў дзейнасці рэдактарат абвясціў, што праз складаныя фінансавыя і палітычныя ўмовы прыпыняе выхад як друкаванай, так і электроннай pdf-версіі. Прынамсі выдання няма ў падпісным каталогу «Белпошты» на першую палову 2023 года.
Пры гэтым літаральна следам Міністэрства інфармацыі нечакана адмяніла ранейшае рашэнне і выдала распараджэнне аб аднаўленні доступу да інтэрнэт-старонкі выдання belmarket.by. Як сведчыць маніторынг, вось ужо месяц інфармацыйны кантэнт бізнес-партала рэгулярна абнаўляецца.
Служба маніторынгу ГА «Беларуская асацыяцыя журналістаў»