Ва Узбекістане ўведзены рэжым надзвычайнага становішча

Замежжа

Указ аб надзвычайным становішчы падпісаў прэзідэнт краіны Шаўкат Мірзіёеў.

22128073_560_848_2179_1759_1920x0_80_0_0_773d19905acac3f4c99af97a79b77f3f.jpg

Шаўкат Мірзіёеў прыбыў у суботу ў сталіцу аўтаномнай рэспублікі Каракалпакстан Нукус і неўзабаве прапанаваў захаваць у Канстытуцыі краіны пункт аб суверэнітэце аўтаноміі. Разам з гэтым з 3 ліпеня ён увёў у мяцежным рэгіёне рэжым надзвычайнага становішча. Ён абвешчаны да 2 жніўня, пра гэта расказаў прэс-сакратар кіраўніка краіны Шэрзод Асадаў.
Таксама ўводзяцца іншыя часовыя абмежаванні:

  • узмацненне аховы грамадскага парадку, асабліва важных аб’ектаў і аб’ектаў, што забяспечваюць жыццядзейнасць насельніцтва;
  • абмежаванне руху транспартных сродкаў;
  • забеспячэнне правядзення асабістага надгляду фізічных асоб, праверкі дакументаў, якія сведчаць іх асобу, надгляд рэчаў і транспартных сродкаў;
  • абмежаванне ўезду і выезду з Каракалпакстана;
  • забараняецца правядзенне мірных збораў, забаўляльных, спартовых і іншых масавых мерапрыемстваў;
  • забараняецца страйк і іншыя дзеянні, накіраваныя на прыпыненне дзейнасці юрыдычных асоб;
  • забараняецца рэалізацыя зброі, баявых прыпасаў да яе, выбуховых рэчываў, спецыяльных сродкаў, атрутных рэчываў. Уводзіцца асаблівы рэжым абарачэння лекавых сродкаў і прэпаратаў, якія змяшчаюць наркатычныя элемэнты і іх аналягі, псіхатропныя і моцнадзейныя рэчывы; этылавага спірту, алкагольнай прадукцыі;
  • забеспячэнне часовага адабрання ў грамадзян зброі і баявых прыпасаў, у арганізацый — зброі і баявых прыпасаў да яе, спецыяльных сродкаў і атрутных рэчываў, а таксама баявой і вучэбна-баявой вайсковай тэхнікі, выбуховых і радыеактыўных рэчываў.

Акрамя таго, на перыяд дзеяння рэжыму надзвычайнага стану ўводзіцца каменданцкая гадзіна з 21:00 да 07:00. Кіраўніком камендатуры прызначылі камандзіра Нацыянальнай Гвардыі Узбекістана Рустама Джураева.
Буйныя пратэсты ў Каракалпакстане пачаліся 1 ліпеня пасля публікацыі праекта паправак да Канстытуцыі. Новая рэдакцыя была вынесена на грамадскае абмеркаванне 26 чэрвеня. У ёй выключаецца сувэрэнітэт Рэспублікі Каракалпакстан і права яе насельніцтва на аддзяленне на аснове ўсеагульнага рэферэндуму. Пасля пратэстаў папраўкі пра адмену аўтаноміі вырашылі скасаваць.