Мінск абверг наяўнасць АЧС у рэспубліцы
Беларусі бок абвінавачвае Рассельгаснагляд у «грубых парушэньнях».
Фота pixabay.com
Мінск абверг наяўнасць АЧС у рэспубліцы і абвінаваціў Рассельгаснагляд у «грубых парушэннях».
Кіраўнік Мінсельгасхарча Леанід Заяц абвінаваціў Рассельгаснагляд у «грубых парушэннях» правіл і абверг інфармацыю пра абвастрэнне сітуацыі з афрыканскай чумой свіней (АЧС) у Беларусі.
«У Беларусі спрыяльная сітуацыя [па АЧС], хачу вас запэўніць», — цытуе беларускага міністра ТАСС.
Заяц яшчэ раз паўтарыў, што скарачэнне пагалоўя свіней у шэрагу рэгіёнаў рэспублікі звязана з закрыццём састарэлых свінакомплексаў. Паводле яго слоў, за апошнія пяць гадоў па краіне закрыта «417 такіх ферм з пагалоўем амаль 250 тысяч».
«Узамен мы адкрылі 19 новых комплексаў па сучаснай тэхналогіі, яны ўжо вырабляюць мяса. Яшчэ пяць комплексаў будуць пабудаваны да 2020 года», — дадаў Заяц.
Паводле яго слоў, беларускі бок прадставіў Рассельгаснагляду інфармацыю аб эпізаатычнай сітуацыі ў краіне. «Мы адкрытыя і гаворым пра тое, што ніколі не дазволім, каб у Расію пастаўлялася прадукцыя сумнеўнай якасці, і тым больш, не дай бог, прадукцыя з вірусам АЧС», — заявіў Заяц. Ён таксама звярнуў увагу на тое, што ўся прадукцыя пры пастаўках на знешні рынак праходзіць пільны кантроль.
Заяц лічыць, што Рассельгаснагляд паступіў няправільна, забараніўшы пастаўкі свініны з усёй тэрыторыі краіны з-за ўспышкі АЧС у Гомельскай вобласці. «Па правілах неабходна зачыняць той рэгіён, які нібыта мае пэўную небяспеку, але ні ў якім разе не ўсю краіну», — адзначыў Заяц. Паводле яго слоў, «гэта найгрубейшае парушэнне, гэтае пытанне трэба падымаць».
Раней Рассельгаснагляд западозрыў Беларусь ва ўтойванні фактаў ачагоў АЧС у краіне. Падставай стала выяўленне генетычнага матэрыялу віруса АЧС у сасісках і каўбасе Гомельскага мясакамбіната. Расійскае ведамства ўвяло часовыя абмежаванні на ўвоз беларускай свініны і запатрабавала высветліць сітуацыю з АЧС на Гомельшчыне.