Першы энергаблок БелАЭС да канца дня зноў падключаць у сетку. У 2021 годзе вырашаць, ці патрэбна другая АЭС

Першы энергаблок БелАЭС сёння плануецца зноў падключыць да сеткі энергасістэмы пасля планавага прыпынення. Пра гэта заявіў на прэс-канферэнцыі міністр энергетыкі Беларусі Віктар Каранкевіч.

— У нас сёння завяршаецца этап "энергетычны пуск". Усе выпрабаванні праведзены паспяхова. Да канца дня сёння плануецца падключэнне да сеткі і выхад на магутнасць рэактара 50% і турбагенератара — 500 мегават, — сказаў міністр.
У далейшым БелАЭС трэба будзе атрымаць дазвол Дзяржатамнагляду на пераход да доследна-прамысловай эксплуатацыі.
— Гэта праграма са сваімі выпрабаваннямі. У рамках гэтага этапу будзе забяспечана засваенне магутнасці рэактара з 50% да 100%, турбагенератара — з 500 да 1190 мегават, — сказаў Каранкевіч.
Кіраўнік Мінэнерга таксама паведаміў, што перспектывы будаўніцтва другой АЭС у Беларусі ацэняць на працягу 2021 года. У цяперашні час дзяржорганы вядуць пошукавыя работы, каб падрыхтаваць адпаведныя матэрыялы і абгрунтаванні. Па выніках гэтай працы прапановы разгледзяць і прымуць рашэнне.
7 лістапада Аляксандр Лукашэнка ўрачыста адкрыў атамную электрастанцыю ў Астраўцы. Аднак ужо на наступны дзень выпрацоўка электраэнергіі была прыпыненая з-за выхаду са строю трансфарматараў напружання.
19 лістапада першы энергаблок БелАЭС ізноў быў уключаны ў сетку энергасістэмы.
Аднак неўзабаве з'явілася неафіцыйная інфармацыя пра нібыта чарговыя складанасці пры выпрабаваннях першага энергаблока, што вылілася ў прыпыненне турбіны.
24 лістапада ў вячэрнім эфіры «Беларусь 1» заявілі, што цяпер першы энергаблок БелАЭС працуе на 40% ад заяўленай магутнасці.
Вечарам 1 снежня Мінэнерга паведаміла, што на першым энергаблоку БелАЭС працягваюцца комплексныя выпрабаванні. Пры гэтым ён уключаны ў сетку. Гэта паведамленне было на фоне распаўсюджаных у тэлеграм-каналах паведамленняў пра складанасці працы першага энергаблока.
3 снежня ў рамках завяршэння этапу энергетычнага пуску на БелАЭС ажыццёўлена планавае адключэнне першага энергаблока ад энергасістэмы, рэактарная ўстаноўка спыненая. Праводзіцца тэставанне ўсіх сістэм і абсталявання, якое будзе доўжыцца да 11 снежня, паведамляла Мінэнерга.
Гатоўнасць першага энергаблока БелАЭС ацэньваецца ў 99%. Будаўніча-мантажныя работы на другім энергаблоку станцыі выкананы на 75%. У цяперашні час тут вядзецца мантаж асноўнага абсталявання, тэхналагічных трубаправодаў і пракладка кабельнай прадукцыі.
tut.by