Прэм'ер Беларусі прапанаваў краінам СНД адмовіцца ад долара і еўра

Раман Галоўчанка лічыць, што максімальны адыход ад узаемаразлікаў у доларах і еўра дасць магчымасць не толькі павялічыць трансгранічныя разлікі, але і стымуляваць узаемны гандаль, а таксама абараніць экспарцёраў і імпарцёраў ад ваганняў курсаў валют трэціх краін.

«Дамагчыся забеспячэння ўстойлівага эканамічнага росту ва ўмовах абвешчанай нам эканамічнай вайны будзе немагчыма без вырашэння адной з сістэмаўтваральных задач — максімальнага сыходу ад узаемаразлікаў у доларах і еўра. Гэта дасць магчымасць не толькі павялічыць трансгранічныя разлікі, якія могуць ажыццяўляцца наўпрост паміж краінамі-ўдзельніцамі, але таксама будзе стымуляваць узаемны гандаль і абароніць экспарцёраў, імпарцёраў ад ваганняў курсаў валют трэціх краін», — сказаў Галоўчанка падчас пасяджэння Савета кіраўнікоў урадаў дзяржаў Садружнасці, якое праходзіла ў рэжыме відэаканферэнцыі.
Па словах беларускага прэм'ера, у СНД ужо практычна сфарміраваная неабходная плацёжная інфраструктура для поўнага сыходу ад долара і еўра.