60 літраў крафтавага піва да 100-годдзя БНР

Аляксандр Валюшка, прадпрымальнік з Брэсту,  зварыў 60 літраў крафтавага піва да 100-годдзя БНР.

Аляксандр Валюшка. Фота Мікола Ляшкевіч

Аляксандр Валюшка. Фота Мікола Ляшкевіч

Уладальнік піўной крамы “Пан Саладоўнік” Аляксандр Валюшка ў выходныя, на якія прыпадае 25 сакавіка, пачастуе наведвальнікаў адмыслова звараным да гэтай даты гатункам піва.

 Падрабязней пра гэта распавёў сам прадпрымальнік:

Для мяне 25 сакавіка — гэта дзень першай беларускай дзяржаўнасці, дзень нашай незалежнасці. Кожны год святкуем яго ўсёй сям’ёй незалежна ад палітычнай сітуацыі ў краіне і таго, ёсць нейкія акцыі ці няма.

Гэтая ідэя з’явілася ў нас даўно. Быў солад, была вада, і было жаданне, была добрая дата. Чаму б не зварыць піва?

Гэта будзе светлы лагер. Галоўнае — гэта тое, што ў ім ёсць тое, чаго няма ў большасці нашага беларускага піва, — любоў і патрыятызм. Гэтага піва можна будзе пакаштаваць у нашай краме задарма ў выходныя, калі будзе святкавацца стагоддзе БНР.

Вядома, што па рашэнні брэсцкага аргкамітэта па святкаванні 100-годдзя Беларускай Народнай Рэспублікі на святочным мітынгу і канцэрце, заяўка на які пададзена ў гарвыканкам, алкагольных і піўных вырабаў не будзе.

“Аднак у дзень напярэдадні і пасля мерапрыемства ніхто не замінае падысці на куфаль у нашую краму”, — зазначыў Аляксандр Валюшка, які таксама ўваходзіць у аргкамітэт.

Мікола Ляшкевіч, Беларускае Радыё Рацыя