«Аляксандар Рыгоравіч, у вас жа сваіх трое сыноў». Маці загінулага салдата напісала Лукашэнку

Адказ прыйшоў з Генпракуратуры. Расследаванне смерці Аляксандра Арлова прызналі няпоўным і неаб’ектыўным, прызначылі дадатковую праверку, піша «Радыё Сабода».

Вайскоўца тэрміновай службы Аляксандра Арлова знайшлі павешаным 5 верасня. На ягонай шыі былі дзве стангуляцыйныя баразны. Родныя салдата адразу заявілі, што не згодныя з версіяй пра суіцыд.

Праверка па факце смерці вайскоўца скончылася толькі ў канцы лютага. Маці загінулага Вользе паведамілі, што ў гібелі яе сына няма слядоў крыміналу. Выпадак прызналі суіцыдам. У пачатку сакавіка Вольга была ў абласным упраўленні Следчага камітэту ў Гродна, ездзіла азнаёміцца з вынікамі праверкі. Аднак у СК жанчыне забаранілі рабіць копіі дакументаў. Вользе стала дрэнна, са Следчага камітэту яна з’ехала на машыне «хуткай».

У канцы сакавіка родныя загінулага салдата нечакана атрымалі ліст з Генеральнай пракуратуры. Там гаворыцца, што гродзенскі абласны СК расследаваў смерць Аляксандра Арлова не ўсебакова, няпоўна і неаб’ектыўна. І паведамляецца, што 18 сакавіка Генпракуратура прыняла рашэнне накіраваць матэрыялы справы аб гібелі салдата на дадатковую праверку. Ёй будзе займацца Цэнтральны апарат Следчага камітэту.

 

 

Маці Аляксандра Арлова Вольга расказала “Свабодзе”, што не звярталася ў Генпракуратуру са скаргай на расследаванне смерці сына. Жанчына кажа, што вырашыла адразу напісаць у адміністрацыю Лукашэнкі асабіста кіраўніку краіны.

«Мне сказалі, што трэба тэкст ліста набіраць на кампутары. Што так лепш будзе, але мне не было дзе, — гаворыць Вольга. — Я ад рукі напісала пра ўсё, на чатырох лістах. Усё сваімі словамі. “Аляксандр Рыгоравіч, у вас жа сваіх трое сыноў, калі б на месцы майго сына быў павешаны ваш, справа ўжо была б закрытая, а забойцы сядзелі ў турме. А як калгаснік, то справу можна закрыць і зрабіць так, што сам вінаваты”, — так і напісала. Што думала, так і напісала».

 

Ліст у адміністрацыю Лукашэнкі Вольга адаслала яшчэ да завяршэння праверкі, на пачатку лютага. Гаворыць, што баялася негатыўнай рэакцыі следчых, аднак вырашыла ўсё ж напісаць. Прычынай такога кроку жанчына называе недавер да ходу праверкі. Па словах Вольгі, яна пакуль не мела размовы з новым следчым у справе сына. Ліст з Генеральнай пракуратуры для яе стаў нечаканасцю.

www.svaboda.org


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: