Беларусь заняла 50-е месца ў індэксе канкурэнтаздольнасці талентаў

Беларусь заняла 50 месца са 134 дзяржаў у Глабальным індэксе канкурэнтаздольнасці талентаў (Global Talent Competitiveness Index 2021), апынуўшыся паміж Чарнагорыяй і Уругваем.

Мэта індэкса — ацаніць рэсурсы і намаганні, якія краіны трацяць на развіццё таленавітых людзей, а таксама якасць чалавечага капіталу.

Ацэнкі і пазіцыі

Паводле ацэнкі складальнікаў рэйтынгу, якімі выступілі міжнародная бізнес-школа INSEAD сумесна з Portulans Institute, Беларусі лепш за ўсё ўдаецца ўтрымліваць таленты ў краіне, чым прыцягваць іх звонку і развіваць.
У індэксе Беларусь, набраўшы 50,67 балаў са 100, трапіла ў групу краін з «прыбыткам вышэй сярэдняга» і апынулася на даволі прыстойнай 50-й пазіцыі. Аднак гэта не перашкодзіла ўсім суседнім краінам, акрамя Украіны, якая размясцілася на 61-м радку, заняць больш прывабныя месцы ў спісе.
У еўрапейскім субіндэксе Беларусь заняла 31-ю пазіцыю з 39 краін. Але варта ўлічыць, што краіны Еўропы займаюць лідзіруючыя пазіцыі ў рэйтынгу. У прыватнасці, 17 еўрапейскіх дзяржаў уваходзяць у топ-25 Індэкса канкурэнтаздольнасці талентаў.

Асаблівасці стаўлення да талентаў

Сумарны «індэкс талентаў» разлічваўся на аснове шасці крытэраў, па кожным з якіх краіне была дадзена ацэнка. Thinktanks.by паглядзеў, як розныя параметры былі ацэненыя ў Беларусі:

• рынкавыя і нарматыўныя ўмовы на рынку працы — 81-е месца;
• шанцы для кар'ернага росту — 57-е месца;
• магчымасці працадаўцаў прыцягваць таленты з усяго свету — 62-е месца;
• здольнасці ўтрымліваць кваліфікаваны персанал унутры краіны — 39-е месца;
• прафесійна-тэхнічныя навыкі людзей — 53-е месца;
• навыкі глабальнай веды, ацэньваюць работнікаў разумовай працы на прафесійных, кіраўніцкіх або кіруючых пасадах — 48-е месца.

Такім чынам, на думку складальнікаў індэкса, лепш за ўсё ў Беларусі ўдаецца ўтрымліваць таленты ўнутры краіны. Адзначым, што для даследавання выкарыстоўваліся даныя 2020 года.

Пенсійнае і феміністычнае чэмпіёнства

Асаблівасць Індэкса канкурэнтаздольнасці талентаў заключаецца ў тым, што кожны з 6-ці базавых параметраў падзелены на 10-20 іншых параметраў-субрэйтынгаў. І ў двух з іх Беларусь займае першае месца са 134 краін. Гэта «Пенсійнае забеспячэнне», у якім супастаўляецца насельніцтва, старэйшае ўстаноўленага законам пенсійнага ўзросту, якое атрымлiвае пенсію. У Беларусі пенсію атрымлівае 100% людзей пенсійнага ўзросту і па дадзеным параметры ў краіны 1-е месца. Праўда, на гэтым 1-м месцы яшчэ размясціліся каля 30 дзяржаў.
А вось другая пальма першынства ўнікальная. У субрэйтынгу «Жанчыны на высокакваліфікаванай працы» ў Беларусі таксама 100-працэнтны ахоп. Падобнага выніку няма ні ў адной краіны, уключанай у Global Talent Competitiveness Index 2021.

Агульныя вынікі

Лідарам індэкса ў 2021 годзе стала Швейцарыя, якая набрала 82,09 бала. Другі і трэці радок індэкса займаюць Сінгапур (79,38) і ЗША (78,81).
Як адзначаюць аўтары даследавання, пандэмія змяніла вызначэнне міжнароднай мабільнасці талентаў. Па меры таго, як анлайн-інструменты адкрывалі новыя дзверы для «працы адусюль», паўстала новая няроўнасць паміж тымі, хто мог працаваць праз інтэрнэт, і тымі, хто павінен быў фізічна прысутнічаць на працоўным месцы.
Акрамя таго, даследчыкі звяртаюць увагу на разыходжанне паміж багатымі і беднымі краінамі, якое расце. Сусветны банк паказвае, што падчас пандэміі ўзровень беднасці павялічыўся ва ўсім свеце і што яшчэ 125 мільёнаў чалавек жывуць менш чым на 1,90 долара ЗША ў дзень. Даныя ААН паказваюць, што ва ўсім свеце працоўныя месцы, займаныя жанчынамі, як правіла, больш схільныя да пагрозаў скарачэнняў, звязаных з COVID, чым працоўныя месцы, займаныя мужчынамі.
Пры гэтым, на думку аўтараў індэкса, больш развітыя краіны валодаюць стабільнасцю для інвеставання ў навучанне на працягу ўсяго жыцця, умацаванне навыкаў, а таксама прыцягненне і ўтрыманне талентаў з усяго свету.