Дом правоў чалавека ў Вільні запрашае на прэзентацыю кнігі Тамковіча "Няскораны Марыніч"

Беларускі дом правоў чалавека імя Барыса Звозскава запрашае на прэзентацыю кнігі беларускага журналіста Аляксандра Тамковіча “Няскораны Марыніч”. 



Фота Барыса Гарэцкага
Прэзентацыя кнігі, прысвечанай Міхаілу Марынічу, беларускаму дыпламату, а потым і палітвязню, пройдзе  1 снежня ў 15.00 у Беларускім ДПЧ імя Б. Звозскава (Вільнюс, вул. Латака, 3).
Кніга «Няскораны Марыніч» складаецца з трох моўных версій — англійскай, беларускай і рускай —  і месціць у сабе апошнія развагі і мноства фотаздымкаў з уласнага архіва Міхаіла Марыніча. Марыніч быў паслом у Чэхіі, Славакіі, Венгрыі, Латвіі, Эстоніі і Фінляндыі, займаў пасаду міністра знешніх эканамічных сувязяў, аднак пасля пераходу ў апазіцыю ён трапіў за краты. Камітэт ААН па правах чалавека прызнаў Міхаіла Марыніча ахвярай палітычных рэпрэсіяў, а суд над ім — несправядлівым. Міхаіл Марыніч памёр 17 кастрычніка 2014 года. Разам з аўтарам на прэзентацыі выступіць таксама былы палітвязень, кіраўнік праваабарончага цэнтра “Вясна” Алесь Бяляцкі. Мадэратарам мерапрыемства выступіць сябра рады «Вясны» і прэзідэнт Беларускага ДПЧ Таццяна Равяка.
Аляксандр Тамковіч —  журналіст, аўтар шэрагу кніг пра значныя палітычныя падзеі Беларусі ды іх уплыў на лёсы людзей — палітвязняў, грамадскіх актывістаў, праваабаронцаў. Гэта ўжо 17-я кніга Аляксандра Тамковіча пра дзеячоў беларускай палітыкі, культуры і прадстаўнікоў грамадскай супольнасці.
Прэзентацыя будзе праходзіць на беларускай мове з перакладам на англійскую.
Пацвердзіць свой удзел арганізатары просяць да 30 лістапада ўключна па электронным адрасе: belarus@humanrightshouse.org. Адказы на пытанні можна атрымаць па тэлефоне  +370 5 212 77 03.