Як Шакута звязаны з бліжэйшым атачэннем Лукашэнкі і яго сынамі
А таксама з Юрыем Караевым.
11 лістапада на плошчы Пераменаў невядомыя напалі на мясцовага жыхара Рамана Бандарэнку, збілі яго, схапілі і павезлі на мікрааўтобусе. У выніку хлопец, якога затым з РУУС на Арлоўскай даставілі ў бальніцу, памёр у рэанімацыі 12 лістапада.
13 лістапада Аляксандр Лукашэнка заявіў, што Бандарэнка быў п'яны (лекары абверглі гэтую інфармацыю, пацвердзіўшы дакументальна, што ўтрыманне этанолу ў крыві складала 0 праміле), і зрабіў цікавую агаворку:
— Ужо ўчора мне далажылі, пачалі паварочваць у бок, што яго збілі — я не называю прозвішчаў, але — людзі, якія бліжэй да прэзідэнта. Слухайце, а гэтыя людзі ўвогуле ў Мінску не былі! Гэта паварочвалі ўжо да таго, што гэта людзі Лукашэнкі, то-бок, гэта я даў каманду.
14 лістапада ў СМІ былі апублікаваныя матэрыялы, у якіх журналісты і людзі, якія ведаюць Дзмітрыя Шакуту, прыйшлі да высновы, што чалавек, які напаў на Бандарэнку ў чорнай камізэльцы і шэрай кофце, вельмі падобны на шматразовага чэмпіёна свету ў тайскім боксе і кікбоксінгу.
У такім выпадку словы Лукашэнкі пра "людзей, якія бліжэй да прэзідэнта" не выглядаюць выпадковымі.
"Салідарнасць" распавядае, як Дзмітрый Шакута звязаны з бліжэйшым асяроддзем кіраўніка дзяржавы і яго сынамі.
Сяброўства з Дзмітрыем Баскавым
Каля месяца таму невядомыя зладзілі бойку ў жылым комплексе «Мегаполіс». На відэа быў зафіксаваны не толькі чалавек, вельмі падобны на Дзмітрыя Шакуту, але і чалавек, вельмі падобны на Дзмітрыя Баскава.
Апошні вядомы імклівым кар'ерным ростам у апошнія гады. Пасля таго як Баскаў папрацаваў трэнерам Мікалая Лукашэнкі і каманды прэзідэнта, ён стаў генеральным дырэктарам мінскага "Дынама "(цяпер ужо кіраўнік назіральнай рады клуба), старшынём Федэрацыі хакея Беларусі і саўладальнікам акумулятарнага завода ў Берасці.
Сумеснае з'яўленне Шакуты і Баскава ў мінскіх дварах не магло быць выпадковым — яны даўно сябруюць.
У адным іх інтэрв'ю баец распавёў пра знаёмства з хакейным брамнікам:
— Сябар, які калісьці трэніраваўся ў мяне ў СОБРы, спытаў, ці можа да мяне адзін хлопец прыйсці пазаймацца. Ды дзеля Бога, хай прыходзіць, мне не шкада. Потым ён ужо сам да мяне падышоў і пытаецца: "Ты ў хакей гуляў калі-небудзь?" – "У дзяцінстве як усё бегаў з клюшкай, калісьці за ЖЭС гуляў". Аказалася, што гэты хлопец — галоўны трэнер моладзевага "Дынама" Дзмітрый Баскаў.
У чэрвені гэтага года Дзмітрый Баскаў таксама публічна ўспомніў пра сябра, тлумачачы, навошта ён набыў долю ва ўласнасці скандальна вядомага завода АКБ у Берасці.
— Заўсёды (гэта звязана і з банкам, і з бізнесам), я шукаю магчымасць нешта зрабіць для хакея, дзіцячага хакея ў асноўным. Ды і не толькі хакея. Мы падтрымлівалі клуб каратэ «Эдэльвейс», нядаўна падарылі мікрааўтобус клубу тайскага боксу «Шок», дзе працуе Шакута.
Пасля прэзідэнцкіх выбараў Баскаў і Шакута ўдзельнічалі ў аўтапрабегах у падтрымку Лукашэнкі. З байцом пазіравала і прэс-сакратар Лукашэнкі Наталля Эйсмант.
16 лістапада ўлады Латвіі забаранілі сябрам Баскаву і Шакуце ўезд у сваю краіну.
Стасункі з сынамі Лукашэнкі
Пасля знаёмства Баскаў прыцягнуў Шакуту да трэніровак каманды "Бастыён", якая выступае ў аматарскім хакейным чэмпіянаце Мінска. Турнір праходзіць пад патранажам Прэзідэнцкага спартыўнага клуба на чале з Дзмітрыем Лукашэнкам.
А сама каманда характэрная тым, што за яе выступаюць старэйшы і малодшы сыны Лукашэнкі, а таксама іншыя характэрныя персоны, блізкія да кіраўніцтва краіны.
У цэнтры ў ніжнім шэрагу —Віктар Лукашэнка, Мікалай Лукашэнка, Дзмітрый Баскаў, начальнік ДАІ Дзмітрый Карзюк. У сярэднім шэрагу над імі — Дзмітрый Шакута
Акрамя таго, Шакута мае зносіны з Віктарам Лукашэнкам і па байкерскім клубе Iron Birds Chapter, куды ўваходзяць ўплывовыя аматары матацыклаў Harley-Davidson.
Знаёмства з Юрыем Караевым
Адно з асноўных заняткаў Шакуты — праца інструктарам у вайсковай частцы 3214 унутраных войскаў МУС. З гэтай структурай цесна звязана біяграфія ўжо былога міністра Юрыя Караева, які за тыдзень да прэзідэнцкіх выбараў сустракаў тут кіраўніка дзяржавы разам з камандзірамі АМАПа і СОБРа.
Акрамя таго, Караеў кіруе Федэрацыяй кікбоксінга Беларусі і, вядома, па гэтай рабоце нямала размаўляў з вядомым байцом.
Адзін з апошніх прыкладаў: у сакавіку гэтага года МУС, Федэрацыя кікбоксінга і Прэзідэнцкі спартыўны клуб запусцілі дабрачынны праект «смелы крок» для цяжкіх падлеткаў. Дзмітрый Лукашэнка распавёў, што майстар-клас для хлопцаў будзе праводзіць Дзмітрый Шакута.