Катаванні палітвязняў. 65-гадовую Алену Гнаўк кінулі ў ПКТ, былога сілавіка Сяргея Коршуна — у ШІЗА

Праваабаронцам стала вядома пра катавальныя ўмовы, у якіх утрымліваюць зараз двух палітвязняў.

Палітзняволеную актывістку з Пружанаў Алену Гнаўк 15 жніўня перавялі ў папраўчую калонію № 4. Стала вядома, што адміністрацыя калоніі нядаўна змясціла 65-гадовую жанчыну ў памяшканне камернага тыпу (ПКТ) да 24 лютага. Акрамя гэтага, яе пазбавілі амаль усіх перадач, званкоў, спатканняў і скарацілі атаварку з трох базавых велічыняў да адной (32 рублі).

Нагадаем, 17 чэрвеня палітзняволеную асудзілі на тры з паловай гады калоніі ва ўмовах агульнага рэжыму і штраф 3200 рублёў. Алену прызналі вінаватай паводле двух крымінальных артыкулаў. Перад этапам у калонію палітзняволеную больш за паўтара месяца ўтрымлівалі ў штрафным ізалятары баранавіцкага СІЗА.

Таксама стала вядома, што палітзняволенага блогера Сяргея Коршуна ўжо 38 дзён утрымліваюць у ШІЗА.

Сяргей Коршун — блогер тэлеграм-канала «Армія з народам», былы супрацоўнік міліцыі. Яго затрымалі ў ліпені 2020 у межах справы па арт. 342 КК. Потым артыкул Коршуну перакваліфікавалі на 293 КК («Навучанне ці іншая падрыхтоўка асоб для ўдзелу ў масавых беспарадках, альбо фінансаванне гэтай дзейнасці»).

Мінскі абласны суд 7 траўня 2021 прысудзіў Сяргею чатыры з паловай гады пазбаўлення волі ў калоніі ўзмоцненага рэжыму.

Паводле інфармацыі праваабаронцаў, фармальнай прычынай змяшчэння палітвязня ў ШІЗА стала «парушэнне правілаў унутранага распарадку».

Тым часам маюцца звесткі, што акадэміка-біёлага Алега Давыдзенку і яго жонку Наталлю пачнуць судзіць напрыканцы снежня.

З канца кастрычніка ў Мінску адбываліся масавыя затрыманні ў Нацыянальнай акадэміі навук. 71-гадовага члена-карэспандэнта НАН Беларусі, доктара біялагічных навук Алега Давыдзенку і яго жонку Наталлю Акцябрскую затрымалі раніцай 2 лістапада.

У залежнасці ад ролі кожнага, іх вінавацяць па двух крымінальных артыкулах: ч. 1 арт. 342 («Актыўны ўдзел у дзеяннях, якія груба парушаюць грамадскі парадак») і арт. 368 (абраза Лукашэнкі). Іх справу будуць разглядаць 29 снежня ў судзе Савецкага раёна Мінска. Працэс будзе весці суддзя Алена Жуковіч.

Давыдзенка — аўтар 300 навуковых працаў, у тым ліку пяці манаграфій, аднаго падручніка, вывеў 19 гатункаў раслін. Ён даследаваў геном карэннага насельніцтва Беларусі.