З сайта A1 знік каментар у падтрымку затрыманага прэс-сакратара кампаніі Мікалая Брэдзелева

Учора скончыліся 15 дзён з моманту затрымання прэс-сакратара А1 Мікалая Брэдзелева. Аднак інфармацыі аб тым, што ён выйшаў на волю, няма. Dev.by заўважыў, што каментар у падтрымку супрацоўніка быў выдалены з сайта A1 Telekom Austria Group.

Як стала вядома, Мікалая Брэдзелева маглі звольніць з кампаніі, пакуль ён быў на Акрэсціна. Журналісты dev.by адправілі запыт А1, напісалі CEO кампаніі, але пацверджання або абвяржэння, а таксама каментара не атрымалі.

Начальнік упраўлення па грамадскіх сувязях А1 Мікалай Брэдзелеў быў затрыманы 10 снежня. На відэа ў праўладных тэлеграм-каналах ён кажа, што з ліпеня 2020-га нібыта перадаваў трэцім асобам інфармацыю, звязаную з яго прафесійнай дзейнасцю, паведамляе дэталі свайго асабістага жыцця.

Аб якой інфармацыі ідзе гаворка, незразумела. Брэдзелеў атрымаў 15 сутак.

У A1 Telekom Austria Group асудзілі затрыманне Мікалая, запэўнілі, што «скарыстаюцца ўсімі даступнымі юрыдычнымі і дыпламатычнымі спосабамі» для падтрымкі і абароны сваіх супрацоўнікаў.

Гэты каментар быў выдалены з сайта A1 Telekom Austria Group.

Прадстаўнік кампаніі ў Вене паведаміў, што Брэдзелеў не меў доступу да дадзеных кліентаў, у кампаніі пачата ўнутранае расследаванне.

На днях намеснік кіраўніка Адміністрацыі прэзідэнта Ігар Луцкі паведаміў, што А1 праверыць ААЦ і што супраць кампаніі будуць прынятыя «самыя жорсткія меры».