Селі батарэйкі. Мінпрыроды растлумачыла адсутнасць аўдыёзапісу сустрэчы з актывістамі

Ініцыятыўная група па барацьбе з будаўніцтвам пад Брэстам акумулятарнага завода атрымала адказ на калектыўную скаргу, пакінутую 10 снежня ў кнізе заўваг і прапаноў Міністэрства прыроды і аховы навакольнага асяроддзя. Нагодай для скаргі стала чарговая адмова чыноўнікаў прадаставіць аўдыёзапісы сустрэчы ў Міністэрстве па пытаннях завода АКБ, якая прайшла 5 снежня.

Ведамства заявіла, што асабісты прыём у міністра Худыка па часе значна перавысіў тэхнічныя магчымасці запісваючай прылады.
«Працягласць прыёму склала пяць з паловай гадзін замест запланаваных дзвюх. Тэхнічная магчымасць аўдыёзапісваючай прылады складае каля двух-трох гадзін бесперапыннага запісу. З прычыны таго, што аўдыёзапіс працягваўся больш пазначанага часу, гэта прывяло да поўнага разраду акумулятарных батарэй і збою ў захаванні інфармацыі», — гаворыцца ў адказе за подпісам намесніка міністра Іі Малкінай.
Пры гэтым яна адзначыла, што пытанні, якія паступілі ў ходзе асабістага прыёму, разгледжаныя ў поўным аб'ёме, а «прымяненне тэхнічных сродкаў прадугледжана законам у якасці правы, а не абавязка кіраўніка арганізацыі».
Падчас паездкі ў Мінск праз 5 дзён пасля прыёма актывісты паспрабавалі атрымаць абяцаны запіс. Аднак у ведамстве адмовіліся прадставіць аўдыё ў сувязі з адсутнасцю міністра Андрэя Худыка.
Перад сустрэчай 5 снежня грамадскіх актывістаў Дзям'яна Лепесевіча, Дзмітрыя Бекалюка, Сяргея Геліса і Аляксандра Кабанава з прадстаўнікамі дзяржаўных структур, якія курыруюць будаўніцтва пад Брэстам акумулятарнага завода, берасцейцаў папрасілі здаць тэлефоны і дыктафоны. Але пры гэтым, па іх словах, міністр Андрэй Худык паабяцаў, што прадаставіць ім аўдыёзапіс. Аднак адразу ж пасля сустрэчы атрымаць яго актывістам не ўдалося. Супрацоўнікі міністэрства сказалі, што файл пашкоджаны, але яны паспрабуюць яго выправіць, пасля чаго звяжуцца з брэстаўчанамі.
Паводле b-g.by