У Баранавічах за каментарый пра Лукашэнку будуць судзіць інваліда-вазочніка. У будынку суда няма пандуса

12 верасня суд Баранавічаў і Баранавіцкага раёна будзе разглядаць справу мужчыны з першай групай інваліднасці Уладзіслава Рабіча, які мае дыягназ ДЦП і выкарыстоўвае вазок. Яго абвінавачваюць паводле ч.2 арт. 368 Крымінальнага кодэкса (абраза Лукашэнкі). Суддзя па справе — Мікалай Кміта, паведамляюць праваабаронцы.

ryabich.jpg

Мужчыну будуць судзіць за «рэакцыю» на пост пра Лукашэнку.

9 жніўня 2022 года ў дом, дзе знаходзіліся Уладзіслаў і ягоны малодшы брат, уварваліся сілавікі. У грубай форме яны пагражалі мужчыну і прапанавалі пракаментаваць напісанае ім у адказ на пост 2020 года пра Лукашэнку: у каментарыі Уладзіслаў пагаджаўся з напісаным у пасце.

Калі б ён «пакаяўся», то міліцыянты «прабачылі б яму». Аднак Уладзіслаў адмовіўся казаць, што памыліўся, і заявіў, што не зменіць сваё меркаванне. Таксама мужчына дадаў: для яго гонар, што да яго прыйшлі 9 жніўня з аўтаматамі. Тады яму паабяцалі крымінальную адказнасць.

Суд прызначылі на 11.00 12 верасня: ён адбудзецца на трэцім паверсе будынка тэрытарыяльнага Цэнтра сацыяльнага абслугоўвання (г. Баранавічы, вул. Леніна, 12). Там няма пандуса.

Уладзіславу Рабічу 24 гады, ён са шматдзетнай сям'і, мае брата-блізнюка таксама з інваліднасцю. У госці да сям'і часта завітвалі мясцовыя журналісты, каб зняць сюжэты ці напісаць матэрыялы пра ўзорную сям'ю і цудоўных дзяцей. Уладзіслаў Рабіч — шматразовы ўдзельнік розных алімпіяд, меў сярэдні бал атэстата 9,4.

«Гэтыя хлопчыкі, якія растуць на маіх вачах, з'яўляюцца прыкладам мужнасці для ўсіх нас. Яны паказваюць, як трэба спраўляцца з цяжкасцямі і верыць у лепшае», — казаў пра братоў старшыня Баранавіцкага гарадскога Савета дэпутатаў Аляксандр Селіфонтаў у 2017 годзе, калі ў чарговы раз прыехаў павіншаваць сям'ю са святамі.

Таксама Уладзіслаў — аўтар блога на спартыўную тэматыку на сайце by.t*ibuna.com.