У СААЗ спрагназавалі тэрміны завяршэння пандэміі каронавіруса
На думку кіраўніка СААЗ Тэдраса Адханома Гебрэісуса, пандэмія каронавруса працягнецца менш, чым пандэмія іспанскага грыпу 1918-1920 гадоў.
Генеральны дырэктар Сусветнай арганізацыі аховы здароўя (СААЗ) Тэдрас Адханом Гебрэісус мяркуе, што справіцца з пандэміяй каронавіруса атрымаецца менш чым за два гады. Адпаведную заяву ён зрабіў у пятніцу, 21 жніўня, параўнаўшы пандэмію SARS-CoV-2 з іспанскім грыпам 1918-1920 гадоў.
"У нас ёсць уразлівасці, звязаныя з глабалізацыяй, большай інтэнсіўнасцю сувязяў людзей, але ёсць і перавагі, якія складаюцца ў лепшых тэхналогіях, таму мы спадзяемся скончыць з гэтай пандэміяй менш чым за два гады", — падкрэсліў кіраўнік СААЗ. Выкарыстоўваючы "даступныя інструменты па-максімуму і разлічваючы на новыя — такія як вакцыны — мы зможам, я думаю, укласціся ў больш кароткія тэрміны, чым пры грыпе ў 1918 годзе", — працягнуў Гебрэісус.
СААЗ раней рэкамендавала дзецям старэйшым за 12 гадоў выкарыстоўваць маскі ў тых жа сітуацыях, што і дарослым. Акрамя таго, захаванне сацыяльнага дыстанцыяваньня па-ранейшаму лічыцца адным з найбольш эфектыўных механізмаў стрымлівання захворвання.
Колькасць інфікаваных актыўна расце ў Заходняй Еўропе
Па даных міжнароднай групы валанцёраў Worldometer на 22 жніўня, з пачатку пандэміі ва ўсім свеце было выяўлена звыш 23 мільёнаў выпадкаў інфікавання, больш за 800 тысяч чалавек памерлі, амаль 15,7 мільёна чалавек паправіліся. Між тым у краінах Заходняй Еўропы, уключаючы Іспанію, Францыю, Германію і Італію, у апошні час расце колькасць тых, хто захварэў, што прымушае ўсё большую колькасць экспертаў казаць пра наступ другой хвалі пандэміі. Так, у Мадрыдзе за 24 гадзіны было зарэгістравана больш за 8 тыс. новых выпадкаў, пасля чаго ўлады рэкамендавалі людзям у шэрагу раёнаў горада не выходзіць з дому. У Францыі другі дзень запар колькасць новых выпадкаў перавышае 4000 — такімі высокімі лічбы не былі з траўня.
dw.com