"І бачу пройдзеныя далі..." — жыццяпіс сына Якуба Коласа
У Дзяржаўным літаратурна-мемарыяльным музеі Якуба Коласа адкрылася выстава “І бачу пройдзеныя далі...”. Яна прысвечана 100-годдзю з дня народзінаў заслужанага дзеяча культуры Беларусі, старэйшага сына народнага паэта Беларусі Якуба Коласа, арганізатара і першага (1957–1980) дырэктара Дзяржаўнага літаратурна-мемарыяльнага музея Якуба Коласа Данілы Міцкевіча (30.09.1914, Пінск – 07.07. 1996, Мінск).
Якуб Колас з жонай і сынам Данілам. Перм, 1917 г.
Злева направа: Якуб Колас, сыны Юрка, Міхась, Даніла, жонка Марыя Дзмітрыеўна. 1928 г.
Злева направа: Міцкевіч Марыя Дзмітрыеўна, Міцкевіч Даніла Канстанцінавіч, Якуб Колас, Міцкевіч Міхаіл Канстанцінавіч. 1942 г.
Лісты Данілы Міцкевіча да Якуба Коласа. 29.06.1956 г.
Фрагменты экспазіцыі.
Фрагменты экспазіцыі.
Фрагменты экспазіцыі.
Фрагменты экспазіцыі.
Ансамбль "Мінскі гармонік"
Жыццёвы і творчы шлях Данілы Канстанцінавіча Міцкевіча раскрываецца ў экспазіцыі праз асабістыя рэчы, дакументы, фотаздымкі, лісты і дарчыя надпісы. На выставе ўпершыню прадстаўлены дакументы з сямейнага архіва, некаторыя фотаздымкі, лісты ваеннага часу і 1950-х гадоў Якуба Коласа і Марыі Дзмітрыеўны Міцкевіч да сына Данілы.
У адкрыцці выставы ўдзельнічалі сваякі Данілы Міцкевіча, ягоныя сябры, былыя супрацоўнікі музея, а таксама дзеячы беларускай культуры і навукі. Пад час адкрыцця экспазіцыі прагучалі песні на словы Якуба Коласа і Янкі Купалы, музыку Івана Раманчука ў выкананні ансамбля “Мінскі грамонік”.
Акадэмік Радзім Гарэцкі назваў Данілу Міцкевіча “ўнікальным, вельмі добразычлівым чалавекам шматгранных інтарэсаў і талентаў”. “Равеснік Першай сусветнай вайны, ён зведаў цяжкае жыццё, але, як Якуб Колас і ўсе Міцкевічы, быў магутным дубам. Таму гэты род выжыў і ўсе ягоныя прадстаўнікі сталі выдатнымі людзьмі. Мы сябравалі сем’ямі і ніколі не забудзем, як ў 1930-я гады, калі былі рэпрэсаваныя мой бацька і дзядзька, нас падтрымала менавіта сям’я Якуба Коласа. Пра гэта ў сваіх выступленнях успамінаў і Даніла Канстанцінавіч. Як хімік ён быў навукоўцам вельмі высокага ўзроўню, хоць і не меў навуковай ступені, бо вылучаўся вялікімі ведамі і выдатнай памяццю. Аднак ён ахвяраваў навуковай кар’ерай дзеля ўшанавання памяці свайго бацькі. І ў справе стварэння музея Якуба Коласа Даніла Міцкевіч праявіў сілу характара, волю і энергію”, — распавёў Радзім Гарэцкі.
Ён пажадаў малодшаму сыну Якуба Коласа Міхаілу Міцкевічу напісаць кніжку пра лёс сваіх старэйшых братоў — Дінілы і Юркі.
Дырэктарка музея Зінаіда Камароўская запрасіла ўдзельнікаў адкрыцця выставы на вечарыну з нагоды 55-годдзя музея, што адбудзецца на пачатку снежня. “А гісторыя нашай установы культуры неад’емная ад імя Данілы Канстанцінавіча Міцкевіча”, зазначыла Зінаіда Камароўская.