Нобель не для Трампа. Дасье ў карыкатурах

Галоўным персанажам карыкатурыстаў зараз з'яўляецца Дональд Трамп, які не атрымаў Нобелеўскую прэмію міру.

Няма сумневу, што ў Дональда Трампа нейкі бзік адносна таго, каб атрымаць Нобеля за мір. Магчыма, гэта звязана з тым, што Барак Абама, ягоны асабісты вораг, у свой час стаў нобелеўскім лаўрэатам у згаданай вышэй намінацыі. Прычым, прэмію ён атрымаў авансам, літаральна на старце сваёй прэзідэнцкай кадэнцыі. Гэты факт тады здзівіў шмат каго, уключаючы мастакоў.

Па ходзе таго, як набліжалася 10 кастрычніка, дзень аб'яўлення лаўрэата прэміі міру-2025, страсці напальваліся. Газета The Times даволі дакладна адлюстравала настрой Трампа: «Скажы Нобелеўскаму камітэту, каб рыхтавалі прэмію… Ці рыхтаваліся да вайны!», — гаворыць прэзідэнт на гэтым малюнку, прыбіраючыся ў касцюм голуба.

Аднак Нобеля за мір уручылі венесуэльскаму апазіцыйнаму палітыку Марыі Карына Мачада. Яе ўзнагародзілі за прасоўванне дэмакратычных правоў народа Венесуэлы. Рашэнне многія не зразумелі. Але ў любым выпадку наўрад такі вынік спадабаўся Трампу, што праілюстраваў, напрыклад, гэты мастак.

Ліберальная прэса тут жа кінулася здзекавацца з лідара MAGA. Так брытанская The Independent адлюстравала Трампа з медалём ад нобелеўскага камітэта. Праўда, медалька аказалася шакаладнай…

Паўстала пытанне, як Трамп будзе кампенсаваць пракол з Нобелем? Па меркаванні гэтага карыкатурыста, ён проста ўручыць прэмію сам сабе.

Але ёсць і больш трывожныя прагнозы. Не выключана, што Дональд паспрабуе каналізаваць эмацыйны негатыў наконт Нобеля супраць нейкага рэжыму. На гэтым малюнку кіраўнік Кітая разглядае рашэнне Нобелеўскага камітэта наконт прэміі міру-2025 як фактычна пачатак вайны з ЗША. Сапраўды, пасля правалу з Нобелем Трамп узняў тарыфы для Кітая на сто працэнтаў. Будзем назіраць, што будзе далей.