У Мінску ўпершыню прадставілі інскрыпты Васіля Быкава з прыватных калекцый (фота)
10 чэрвеня ў Дзяржаўным музеі гісторыі беларускай літаратуры адкрылася літаратурна-дакументальная экспазіцыя «Васіль Быкаў. Пункціры жыцця…», прымеркаваная да 95-годдзя з дня нараджэння Васіля Быкава і да 75-годдзя вызвалення Беларусі ад нямецка-фашысцкіх захопнікаў.
У аснове экспазіцыі — рэдкія фотаздымкі і дарчыя аўтографы на кнігах сябрам і калегам: Алесю Адамовічу, Лідзіі Арабей, Рыгору Барадуліну, Генадзю Бураўкіну, Сяргею Законнікаву, Аляксею Карпюку, Пімену Панчанку, Валянціну Тарасу, Івану Чыгрынаву, Марыі Хайноўскай.
Дарчы аўтограф Аляксею Карпюку
Адзін з апошніх аўтографаў Васіля Быкава
Дарчы аўтограф Рыгору Барадуліну
Аўтограф для сына Якуба Коласа Данілы Канстанцінавіча Міцкевіча
Выстава ўнікальная найперш тым, што большасць кніг з быкаўскімі інскрыптамі захоўваецца ў прыватных бібліятэках і шырокай публіцы прадстаўлена ўпершыню.
Тут можна ўбачыць, напрыклад, дарчы аўтограф паэту і сябру Г. Бураўкіну, што датуецца далёкім 1964 годам: «Генадзю Бураўкіну ў знак захаплення яго гарачнасцю дзеля справядлівасці», і інскрыпт яшчэ аднаму блізкаму сябру гродзенскіх часоў: «Аляксею Карпюку, нязломнаму чалавеку, сябру, пісьменніку гучнага голаса, з упэўненасцю ў яго будучым, таксама як і з павагаю да яго мінулага». Ці адзін з апошніх аўтографаў пісьменніка ад 17 чэрвеня 2003 года: «Мілай Наташы Адамовіч ад хворага Быкава з пажаданьнем не хварэць!»
Дачка Аляксея Карпюка Алена Аляксееўна Сівакова
Дырэктар Нацыянальнага тэатра імя Янкі Купалы Павел Латушка
Наталля Адамовіч разам з Андрэем Архіпенкам, дзякуючы якому на Бабруйшчыне не забываюцца пра свайго земляка Алеся Адамовіча
Навум Гальпяровіч і Анатоль Бутэвіч
Юлія Якалеўна Бураўкіна (у цэнтры) і Наталля Адамовіч (справа)
Аўтар навуковай канцэпцыі экспазіцыі Вольга Гулева
У першым шэрагу Сяргей Законнікаў, дырэктар Дзяржаўнага музея гісторыі літаратуры Міхаіл Рыбакоў і Павел Латушка
Сяргей Законнікаў з Верай і Марыяй Міцкевічамі
Аўтограф Пімену Панчанку і вішнавальная паштоўка Пімена Емельянавіча
Дарчы аўтограф Сяргею Законнікаву
Кнігі з дарчымі аўтографамі Генадзю Бураўкіну і лісты Генадзя Мікалаевіча
Лісты і кнігі з дарчымі аўтографамі Алесю Адамовічу
На адкрыццё выставы прыйшлі вядомыя асобы: Юлія Якаўлеўна Бураўкіна, дачка Алеся Адамовіча Наталля Аляксандраўна, дачка Аляксея Карпюка Алена Аляксееўна Сівакова, унучкі Якуба Коласа Вера і Марыя Міцкевічы, актрыса літаратурнага тэатра «Слова» Зінаіда Феакцістава; літаратары Анатоль Бутэвіч, Навум Гальпяровіч і Сяргей Законнікаў, а таксама Павел Латушка, у бытнасць якога міністрам культуры ў Ждановічах з’явіўся Музей-дача Васіля Быкава, што пасля зімовага перапынку зноў адкрыты для наведвальнікаў.
Фота аўтара