Хакеры спрабавалі шпіёніць за старшынёй Еўрапейскага цэнтрабанка Крысцін Лагард праз нумар мабільнага Ангелы Меркель

У Германіі расследуюць хакерскія атакі на кіраўніка ЕЦБ і высокапастаўленых палітыкаў.
Крысцін Лагард і Ангела Меркель. Фота: «Reuters»

Крысцін Лагард і Ангела Меркель. Фота: «Reuters»


Зламыснікі спрабавалі ўзламаць акаўнт кіраўніцы Еўрапейскага цэнтральнага банка Крысцін Лагард у месенджары WhatsApp, выкарыстоўваючы меркавана сапраўдны нумар мабільнага тэлефона экс-канцлеркі Германіі Ангелы Меркель, піша «Deutsche Welle».

Паведамляецца, што Лагард была не адзінай мішэнню: пад увагу хакераў трапілі шэраг еўрапейскіх чыноўнікаў — праз выкарыстанне выкрадзеных асабістых даных высокапастаўленых нямецкіх палітыкаў.

Крысцін Лагард, якую звязвае асабістае сяброўства з Ангелай Меркель, атрымала SMS-паведамленне нібыта з нумара экс-канцлеркі Германіі з прапановай працягнуць камунікацыю ў WhatsApp. Падман раскрыўся, калі Лагард пазваніла Меркель, каб удакладніць, ці сапраўды яна адправіла гэтае паведамленне. Верагодна, мэтай хакераў быў код ідэнтыфікацыі, з дапамогай якога яны маглі б атрымаць доступ да акаўнта Лагард у месенджары.

Як зламыснікі даведаліся нумар былой кіраўніцы ўрада Германіі, пакуль не ясна. 

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: