Кампанія з санкцыйнага спісу абскардзіць рашэнне Савету ЕС

Кампанія «Сінезіс», якая займаецца распрацоўкай сістэмы татальнага відэаназірання за беларусамі, за што патрапіла ў санкцыйны спіс ЕС, будзе абскаржваць рашэнне савета Еўрасаюза, паведамляе «Еўрарадыё».

ІT-кампанія заяўляе, што "Сінезіс" не мусіў трапіць пад санкцыі ЕС, і прычына, па якой гэта здарылася, "глыбока памылковая і заснавана на няправільным разуменні функцыянавання тэхналогій распазнання асоб, якімі займаецца кампанія". Кампанія сцвярджае, што тэхналогія, якую яна распрацоўвае, не выкарыстоўвалася уладамі Беларусі для ідэнтыфікацыі пратэстоўцаў, і што "Сінэзіс" ніколі не атрымліваў грошай ад МУС і іншых праваахоўных органаў.

"Кампанія заўсёды імкнулася да празрыстасці ў сваёй дзейнасці. Каб цалкам пацвердзіць вышэй сказанае, Synesis прапанавала любому еўрапейскаму ці іншаму ўраду правесці знешні аўдыт сваіх паслуг. Нягледзячы на ​​абмен інфармацыяй і неаднаразовы накіраванне гэтай прапановы кампетэнтным еўрапейскім органам, Synesis цалкам праігнаравалі. Замест гэтага Савет прыняў рашэнне, якое, падобна, заснавана выключна на спекуляцыях ў сродках масавай інфармацыі і ў розных сацыяльных сетках. Пры гэтым Савет прадэманстраваў памылковую аргументацыю і поўнае грэбаванне належнай прававой працэдурай", — гаворыцца на сайце "Сінэзіс".

Кампанія мяркуе, што сваім рашэннем ЕС паставіў пад фінансавую пагрозу супрацоўнікаў "Сінезісу" і іх сем'і. Цяпер кіраўнікі кампаніі робяць усё магчымае, каб змягчыць уплыў рашэння на супрацоўнікаў і міжнародных партнёраў.

Савет ЕС назваў "Сінэзіс" — рэзідэнта парка ПВТ — адказным "за падаўленне грамадзянскай супольнасці і дэмакратычнай апазіцыі з боку дзяржаўнага апарату ў Беларусі". І дадаў, што супрацоўнікам кампаніі забаронена мець зносіны, што парушае іх правы, а карыстальнікамі сістэмы з'яўляюцца КДБ і МУС.