Лідары беларускай апазіцыі заклікалі прэзідэнта і прэм'ер-міністра Польшчы падтрымаць «Хартыю-97»
Лідары беларускай апазіцыі накіравалі ліст прэзідэнту Польшчы Анджэю Дудзе і прэм'ер-міністру краіны Матэушу Маравецкаму з просьбай падтрымаць працу незалежнага інфармацыйнага сайта Charter97.org, рэдакцыя якога з-за рэпрэсій з боку беларускіх уладаў сёння знаходзіцца ў Варшаве.
Сёлета фінансаванне партала было значна скарочана.
Да кіраўнікоў польскай дзяржавы звярнуліся: першы кіраўнік незалежнай Беларусі Станіслаў Шушкевіч, кіраўнік праваабарончага цэнтру «Вясна» Алесь Бяляцкі, лідары Беларускага Нацыянальнага Кангрэсу Мікалай Статкевіч і Уладзімір Някляеў, сустаршыня партыі «Беларуская Хрысціянская Дэмакратыя» Павел Севярынец, лідар профосоюза работнікаў радыёэлектроннай прамысловасці (РЭП) Генадзь Фядыніч, каардынатар грамадзянскай кампаніі «Еўрапейская Беларусь» Яўген Афнагель.
У лісце лідараў беларускай апазіцыі гаворыцца:
Мы хацелі б выказаць падзяку польскай дзяржаве за запрашэнне і магчымасць працы на тэрыторыі Польшчы рэдакцыі беларускага інтэрнэт-парталу «Хартыя-97» (charter97.org). Пасля таго, як у 2010 годзе ў выніку брутальных рэпрэсій супрацоўнікі «Хартыі» былі вымушаныя з'ехаць з Беларусі, менавіта Польшча аказала дапамогу, якая дазволіла ўзнавіць працу рэдакцыі.
Сёння Беларусь знаходзіцца ў складаным становішчы. Зараз наша краіна ў выніку папушчальніцтва і садзейнічання кіруючага рэжыму апынуўся ў расійскім інфармацыйным полі. На беларускае грамадства штохвілінна абвальваецца магутны струмень маскоўскай прапаганды.
У інтэрнэт-прасторы бясспрэчным лідарам супраціву інфармацыйнай агрэсіі з'яўляецца легендарная «Хартыя-97» — першы і, нягледзячы на спробы рэжыму заблакаваць яго, самы папулярны беларускі грамадска-палітычны сайт.
Але зараз падтрымка з боку Польшчы памяншаецца да памераў, пры якіх выкананне рэдакцыяй сайта сваёй місіі робіцца немагчымым.
Страта ключавога апірышча супрацьстаяння інфармацыйнай агрэсіі ў Сетцы ў час, калі пагроза нашай незалежнасці рэзка ўзрастае, можа мець цяжкія наступствы для нашай краіны.
Мы звяртаемся да вас як да кіраўнікоў польскай дзяржавы з просьбай дапамагчы ў справе падтрымкі інтэрнэт-парталу «Хартыя-97». Просім вашай дапамогі, каб захаваць гэта ўнікальнае медыя, якое эфектыўна супрацьстаіць расійскай прапагандзе ў Беларусі. Мы ўпэўненыя, што гэта будзе служыць бяспецы і незалежнасці не толькі беларускага, але і польскага народа.
За нашу і вашу свабоду!
З павагай,
Станіслаў Шушкевіч, першы кіраўнік незалежнай Беларусі
Генадзь Фядыніч, лідар прафсаюза работнікаў радыёэлектроннай прамысловасці
Мікалай Статкевіч, лідар Беларускага Нацыянальнага Кангрэсу, старшыня партыі «Народная Грамада»
Алесь Бяляцкі, кіраўнік праваабарончага цэнтру «Вясна»
Уладзімір Някляеў, лідар Беларускага Нацыянальнага Кангрэсу
Павел Севярынец, сустаршыня партыі «Беларуская Хрысціянская Дэмакратыя»
Яўген Афнагель, каардынатар грамадзянскай кампаніі «Еўрапейская Беларусь»
