Лілія Ананіч прызначаная міністрам інфармацыі

Аляксандр Лукашэнка 30 чэрвеня прызначыў міністрам інфармацыі Лілію Ананіч, якая раней займала пасаду першага намесніка міністра, паведамляе прэс-служба прэзідэнта.



Нагадаем, ранейшы міністр інфармацыі Алег Праляскоўскі, які займаў гэтую пасаду з снежня 2009 года, быў адпраўлены ў адстаўку 4 чэрвеня ўказам прэзідэнта. Прычына адстаўкі не называлася. Выконваючым абавязкі міністра была прызначаная Ананіч.
Лілія Ананіч нарадзілася ў 1960 годзе ў вёсцы Лявонава Барысаўскага раёна Мінскай вобласці. Скончыла факультэт журналістыкі БДУ (1982) і Акадэмію кіравання пры прэзідэнце Рэспублікі Беларусь (2000). З 1982 па 1984 гады працавала фотакарэспандэнтам раённай газеты  «Шлях камунізму». З 1984 па 1992 гады - рэдактар​​, а затым старшы рэдактар ​​НДІ сродкаў аўтаматызацыі ў Мінску. З 1992 па 1996 гады - рэдактар​​, галоўны спецыяліст, намеснік начальніка ўпраўлення СМІ Міністэрства культуры і друку. З мая 1996-га па лістапад 2001 працавала намеснікам начальніка, начальнікам інфармацыйна-аналітычнага ўпраўлення Дзяржкамітэта па друку. З лістапада 2001-га па лістапад 2003 займала пасаду намесніка міністра інфармацыі. У снежні 2003 года была прызначаная першым намеснікам міністра інфармацыі.
БелаПАН