Літва просіць дадатковую дапамогу NATO з-за пагрозы з боку Беларусі

Прэзідэнт Літвы Гітанас Наўседа ў інтэрв'ю Politico заявіў, што NATO неабходная больш «прыкметная» прысутнасць у Балтыі, каб супрацьстаяць пагрозе, якая зыходзіць ад Расіі з тэрыторыі Беларусі.

nauseda_4.jpeg

Па яго словах, «вельмі вялікія фундаментальныя змены» ў суседняй Беларусі робяць Літву больш уразлівай для хуткай расійскай атакі — і патрабуюць змены механізмаў бяспекі ў рэгіёне. Ён сказаў, што назваў бы сённяшнюю Беларусь «дадатковай правінцыяй» Масквы, дадаўшы, што «расійскае войска можа рабіць усё, што захоча, перамяшчаць сілы, размяшчаць абсталяванне».

Наўседа адзначыў, што ў мінулым стратэгія NATO была накіравана на падмацаванне. Адносна невялікія сілы размяшчаліся на ўсходняй мяжы альянсу, і чакалася, што саюзнікі прыйдуць на дапамогу рэгіёну ў выпадку нападу. Але новая рэальнасць, са слоў літоўскага лідара, «не пакідае нам часу для рэакцыі», бо расійскія войскі «могуць быць лёгка разгорнутыя вельмі блізка да нашай мяжы», і «часу на падмацаванне не будзе».

Цяпер афіцыйныя асобы краін Балтыі просяць больш войскаў, зброі і сродкаў супрацьпаветранай абароны.

Нямеччына, якая ўжо ўзначальвае баявую групу NATO ў Літве, нядаўна абвясціла, што павялічыць свой уклад у абарону краіны. План уключае ў сябе войскі, якія будуць накіраваныя на гарантаванне бяспекі Літвы, але фармальна будуць грунтавацца ў Нямеччыне.

Чакаецца, што гэтая мадэль будзе паўтораная ў некаторых іншых краінах. Афіцыйныя асобы і дыпламаты NATO вядуць перамовы аб кампрамісе, згодна з якім некаторыя саюзнікі павялічаць сваю прысутнасць на ўсходнім флангу — у тым ліку шляхам размяшчэння там большай колькасці ўзбраенняў і выдзялення войскаў для абароны рэгіёну — але без абавязацельстваў па стварэнні доўгатэрміновых, буйнамаштабных пастаянных баз.

«Нямецкі бок прадэманстраваў цвёрдую рашучасць павялічыць перадавую прысутнасць ў Літве», — адзначыў Науседа.

Паводле яго слоў, «самае важнае» для Балтыі — гэта «атрымаць вельмі выразныя запэўніванні» ад саюзнікаў аб «больш прыкметнай перадавой прысутнасці ў Балтыі».

І хоць асобы, якія прымаюць рашэнні ў рэгіёне, настойваюць на павелічэнні колькасці войскаў і больш сталай прысутнасці ў гэтым рэгіёне, прэзідэнт прызнаў наяўнасць шматлікіх лагістычных перашкод.

Пастаяннае размяшчэнне сіл NATO ў Літве «было б нашым прыярытэтам, але гэта таксама залежыць ад нашых магчымасцяў, здольнасці да абсорбцыі», — сказаў ён, паказаўшы на неабходнасць адэкватнай інфраструктуры, жылля і навучальных памяшканняў.

Па словах літоўскага лідара, гэта вуліца з двухбаковым рухам.

«З аднаго боку, мы павінны выконваць хатнюю працу, — сказаў ён. — З іншага боку, нашы саюзнікі павінны падрыхтавацца да адпраўкі ў Літву дадатковых войскаў, таму што для нас гэта відавочны прыярытэт».

«Мы хацелі б дасягнуць максімуму ў абодвух адносінах: перш за ўсё, павялічыць нашы магчымасці, каб размясціць больш. І, вядома, мы вельмі зацікаўлены ў тым, каб гэтыя войскі былі на пастаяннай аснове», — падкрэсліў літоўскі лідар.

Паводле reform.by.