Лукашэнка схлусіў 17 верасня, сказаўшы, што ЗША штурхаюць Еўропу ў вайну з РФ. Румынія абурылася

Часовага паверанага ў справах Беларусі ў Румыніі па патрабаванні міністра Багдана Аўрэску выклікалі ў МЗС гэтай краіны для тлумачэння пазіцыі, паведамляе прэс-служба знешнепалітычнага ведамства Румыніі.

Незадаволенасць румынскага боку выклікалі заявы Аляксандра Лукашэнкі, якія ён зрабіў 17 верасня падчас выступу на так званым патрыятычным форуме ў «Мінск-Арэне». Нагадаем, Лукашэнка заявіў, што ЗША «штурхаюць Еўропу ў ваеннае супрацьстаянне з Расіяй на тэрыторыі Украіны». Пры гэтым ён сказаў, што ў вайну ў хуткім часе непасрэдна будзе ўцягнутая ў тым ліку Румынія.

«Румынскі бок рашуча абвяргае такія недапушчальныя заявы, якія падсілкоўваюць рыторыку, заснаваную на закліку да сілы і пагрозы сілай у міжнародных адносінах. Таксама нельга ігнараваць ролю і міжнародную адказнасць Беларусі як памагатага Расіі ў падтрымцы агрэсіўнай вайны супраць Украіны», — гаворыцца ў тлумачэнні для прэсы МЗС Румыніі адносна заяваў Лукашэнкі.

МЗС Румыніі нагадаў, што краіна з'яўляецца дзяржавай — членам НАТА і ў вышэйшай ступені карыстаецца ўсімі гарантыямі бяспекі, вынікаючымі з гэтага статусу ў адпаведнасці з пунктам аб калектыўнай абароне ў Артыкуле 5 Паўночнаатлантычнага дагавора. Там адзначылі, што НАТА з'яўляецца самым моцным ваенна-палітычным саюзам у гісторыі.

Класкоўскі: Лукашэнка не мае намеру дараваць сваім апанентам

Даслоўную цытату з выступу Лукашэнкі прыводзіць reform.by:

— А што сёння? Злучаныя Штаты Амерыкі штурхаюць Еўропу ў ваеннае супрацьстаянне з Расіяй на тэрыторыі Украіны. Свае планы яны не хаваюць — кантракты ўжо заключаны на гады наперад. Гэта значыць, Украіну будуць разбураць дашчэнту. І мэта пры гэтым — паслабленне Расіі і знішчэнне Беларусі.

І яшчэ адна мэта заакіянскіх гаспадароў. Мэта — Еўропа. Амерыка з'яўляецца адзінай краінай — атрымальнікам выгады ад таго, што адбываецца тут. І Еўропу на месца паставіць, і прыбраць канкурэнтаў. Сёння Украіна, заўтра будзе Малдова ці Прыбалтыка, Польшча ці Румынія. Штаты раздзімаюць вайну ў Косаве, спрабуючы ціснуць на Сербію, падкідваюць вуголле ў тлеючыя супярэчнасці ў Карабаху, каламуцяць ваду ў Сірыі. Пра Украіну я ўжо сказаў. Не ўсё проста ў Афганістане і суседніх дзяржавах.

Адзначым, што вострая рэакцыя Румыніі, хутчэй за ўсё, выклікана тым, што словы Лукашэнкі афіцыйны Бухарэст чамусьці ўспрыняў усур'ёз. Польшча, краіны Балтыі, альбо Малдова з уласна Украінай на лукашэнкаўскі «геапалітычны» словаблуд даўно не рэагуюць. А калі ўсё ж робяць гэта, то хутчэй у жанры тролінгу, як тыя ж украінцы.