Старшыня КДБ: Суд над Гайдуковым будзе закрытым
Судовыя слуханні па справе Андрэя Гайдукова, абвінавачанага ў здрадзе дзяржаве, хутчэй за ўсё, пройдуць за зачыненымі дзвярыма, паведаміў журналістам у чацвер старшыня КДБ Беларусі Валерый Вакульчык.
Андрэй Гайдукоў
«Безумоўна, суд будзе закрытым», — сказаў Вакульчык.
Пры гэтым ён адзначыў: «Я думаю, што пасля таго, як будзе абвешчана рашэнне суду, тыя людзі, якія яго абаранялі, апынуцца ў нязручным становішчы.
Ён не паспеў здзейсьніць злачынства, быў своечасова выяўлены, але гэта была, як мы кажам, класіка — усё было зроблена чыста».
Вакульчык таксама ўдакладніў, што прад’яўленае Гайдукову абвінавачанне не мянялася, паведамляе Інтэрфакс.
Матэрыялы крымінальнай справы ў дачыненні да А.Гайдукова паступілі ў Віцебскі абласны суд.
Гайдукоў быў затрыманы 8 лістапада 2012 г. у Віцебску супрацоўнікамі КДБ. Гайдукоў працаваў на «Нафтане» і быў намеснікам
кіраўніка незарэгістраванай беларускай моладзевай арганізацыі «Саюз маладых інтэлектуалаў».
Паводле КДБ, ён займаўся па заданні замежнай выведкі зборам і перадачай інфармацыі палітычнага і эканамічнага характару і быў затрыманы супрацоўнікамі КДБ
у момант закладкі тайніка са «звесткамі, якія цікавяць замежныя спецслужбы».
У дачыненні да яго была ўзбуджаная крымінальная справа паводле ч.1 арт.356 «Здрада дзяржаве ў форме правядзення агентурнай дзейнасці», ён быў змешчаны ў СІЗА КДБ. Андрэю Гайдукову пагражае да 15 гадоў зняволеньня.