З барысаўскага «БАТЭ» звольнілі трох нежаданых футбалістаў

Пасля 2020 года па ўсёй Беларусі праходзяць не толькі затрыманні і суды па палітычных матывах, але і масавыя чысткі. Людзей, якіх западозрылі ў нелаяльнасці (альбо недастатковай лаяльнасці), звальняюць з працы з воўчым квітком. Адбываецца гэта і ў спорце — у прыватнасці, у футболе.

Так, сёння стала вядома пра звальненні ў самым тытулаваным футбольным клубе краіне — барысаўскім «БАТЭ». Як паведамляе «Тр*буна», пад чыстку трапілі трое гульцоў. Гаворка пра галкіпера Дзяніса Шчарбіцкага, абаронцу Данілу Нячаева і паўабаронцу Дзмітрыя Бяссмертнага.

Акрамя таго, пад вялікім пытаннем будучыня ў камандзе двух аўтарытэтных ветэранаў — сапраўдных легенд «БАТЭ» — капітана Станіслава Драгуна і абаронцы Максіма Бардачова. Абодва дагэтуль не маюць кантрактаў з клубам, хаця футбольны сезон у Беларусі ўжо распачаўся.

Паводле звестак выдання, Нячаеў і Бяссмертны прымалі ўдзел у першым матчы 1/4 фіналу Кубка Беларусі супраць бабруйскай «Белшыны», а вось на матч у адказ футбалісты заяўлены ўжо не былі. Абодва футбалісты, дарэчы, з'яўляюцца падпісантамі праўладнага ліста спартсменаў, але гэта ім не дапамагло.

У снежні 2022-га паведамлялася пра стварэнне «чорнага спісу» Мінспорту як мінімум з 48 прозвішчаў, у асноўным з удзельнікаў відэа супраць гвалту ў верасні 2020-га. З фігурантамі спісу беларускім клубам было забаронена заключаць кантракты.

Пазней стала вядома, што з гэтага пераліку робяцца выбарачныя выключэнні, на што могуць паўплываць прашэнні кіраўнікоў клубаў і ўдзел у рэжымных мерапрыемствах. Некаторым гульцам, аднак, не дапамагае і гэта.

Паводле неаднойчы пацверджаных звестак, курыруе чысткі ў беларускім футболе асабіста міністр спорту (і былы ахоўнік Лукашэнкі) Сяргей Кавальчук. Пры гэтым справы ў футболе зараз найгоршыя за ўсю гісторыю — на міжнароднай арэне з трэскам ужо каторы год запар правальваюцца як зборная, так і клубы. Але, як бачым, Мінспорту гэта не клапоціць, абы ў футбольныя шэрагі не патрапіў хтосьці нязгодны з «палітыкай партыі».

Аляксандр Івулін: Стаў чэмпіёнам калоніі па футболе, атрымаў больш за тысячу лістоў

Характэрна, што статуты Міжнароднай федэрацыі футбола (ФІФА) і Саюза еўрапейскімх футбольных асацыяцый (УЕФА) катэгарычна забараняюць дыскрымінацыю спартсменаў па палітычнай прыкмеце. За гэта прадугледжаны санкцыі, наўпрост да прыпынення сяброўства нацыянальнай федэрацыі ў міжнародных структурах. Беларускі Фонд спартыўнай салідарнасці неаднаразова даводзіў да УЕФА інфармацыю ад катастрафічным становішчам з правамі чалавека ў сферы футбола, аднак чыноўнікі арганізацыі не хочуць праводзіць хабя б якога расследавання і кіруюцца ў сваёй працы прынцыпамі «рэал палітык». Тым больш ніхто са звольненых гульцоў (а Барысаў — не першы выдапак) уголас не скардзіцца на дыскрымінацыю праз меркаванні асабістай бяспекі.

Пры гэтым за будучыню звольненых з «БАТЭ» атлетаў хвалявацца не варта. Футбольны свет меж не мае, праз некаторы час яны змогуць працаўладкавацца ў камандах іншых краін. Самы папулярны кірунак зараз у беларускіх футбалістаў — Казахстан. Там шмат і гульцоў, і трэнераў, і яны на добрым рахунку. У тым ліку тыя, каму забаронена выступаць на радзіме.