Арнольду Шварцэнэгеру — 75 гадоў. Дасье ў карыкатурах
Цяжка паверыць, але культурысту, акцёру і былому губернатару Каліфорніі Шварцэнэгеру 30 ліпеня споўнілася 75 гадоў. Успомніць этапы біяграфіі легендарнага Арні дапамогуць карыкатуры.
Як вядома, сваю кар'еру малады аўстрыец Арнольд Шварцэнэгер пачынаў у культурызме. Пачаўшы «цягаць жалеза» яшчэ ў дзяцінстве, ён ужо ў 17 гадоў упершыню ўдзельнічае ў спаборніцтвах па бодзібілдынгу. А ў 1967-м 20-гадовы спартсмен Арнольд Шварцэнэгер перабраўся ў Амерыку і заваяваў там свой першы тытул — «Містэр Сусвет», стаўшы самым маладым у гісторыі пераможцам гэтага конкурсу. Больш за тое, у 1970-я Арні атрымліваў тытул «Містэр Алімпія» шэсць гадоў запар. Не дзіўна, што першыя карыкатуры, прысвечаныя Шварцэнэгеру, выяўляюць яго як уладальніка велізарных мускул.
Не ўсе ведаюць, што паралельна са спортам Шварцэнэгер ажно з 1969 года здымаўся ў кіно і серыялах. Аднак рэальны поспех да яго прыйшоў толькі ў 1982-м, калі ён выканаў галоўную ролю ў фільме «Конан-варвар». Графікі тут жа закінулі тэму Арні-культурыста і сталі адлюстроўваць яго ў выглядзе воіна-варвара.
Аднак сапраўды знакамітым на ўвесь свет Арнольд стаў пасля таго, як сыграў ролю робата з будучыні ў «Тэрмінатары». А фраза яго героя «I”m back» (англ.: Я вярнуся) увайшла ў топ самых вядомых кінацытат. Не дзіўна, што на карыкатурах Арні часта вымаўляе менавіта гэтыя словы.
Асобна трэба сказаць пра феномен Шварцэнэгера ў познім СССР, дзе з яго фільмамі людзі знаёміліся ў відэасалонах. Літаральна адразу артыст стаў народным кумірам. Усе сцены напаўпадпольных спартзалаў былі абвешаныя плакатамі Шварца, як яго тады называлі ў нас. Вельмі часта карыкатуры на Арні тады з'яўляліся ў СМІ.
Між тым у 2003-м папулярны акцёр і культурыст Арнольд Шварцэнэгер вырашае кардынальна змяніць звыклае жыццё і падаецца ў палітыку. У выбарчай кампаніі яму дапамагаў вобраз Тэрмінатара, які графікі выбарчага штаба Арні ператварылі ў «Губернатара». У выніку знакамітасць абралі на пасаду губернатара штата Каліфорнія, нягледзячы на тое, што ў «Тэрмінатара» да гэтага не было ніякага палітычнага вопыту.
Шварцэнэгер пратрымаўся ў крэсле губернатара аж два тэрміны. Найбольш ён запомніўся кампаніяй за скарачэнне выдаткаў чыноўнікаў. Сам Арні ў межах той кампаніі адмовіўся ад зарплаты губернатара ў 175 тысяч долараў за год. Ён легалізаваў аднаполыя шлюбы, спрабаваў праводзіць экалагічную палітыку, негатыўна выказваўся наконт вайны ў Іраку.
Пасля зыходу з палітыкі Арні працягвае здымацца ў кіно, хаця зараз вонкава падобны да тыповага дзядка на пенсіі. Але варта памятаць адзін нюанс. У папулярным мультфільме «Сімпсаны» Шварцэнэгер выяўлены як будучы прэзідэнт ЗША. А тое, што адбываецца ў «Сімпсанах», парадаксальным чынам вельмі часта здзяйсняецца.
