Канцлер Аўстрыі Себасцьян Курц сыходзіць у адстаўку

Канцлер Аўстрыі Себасцьян Курц сыходзіць у адстаўку пасля вылучаных супраць яго абвінавачанняў у карупцыі, паведамляе news.at. У якасці свайго пераемніка ён прапанаваў кіраўніка МЗС Аляксандэра Шаленберга.

Курц паведаміў, што заява не азначае прызнання віны і зноў назваў вылучаныя супраць яго абвінавачанні ілжывымі. Сам ён застанецца лідарам кансерватыўнай Аўстрыйскай народнай партыі (АНП) і зойме месца дэпутата Нацыянальнага савета.
Напярэдадні паведамлялася, што пракуратура па пытаннях эканомікі і карупцыі Аўстрыі пачала расследаванне ў дачыненні да канцлера Курца і яшчэ дзевяці функцыянераў па падазрэнні ў карупцыі і хабарніцтве.
Прэтэнзіі звязаныя з выкарыстаннем бюджэтных сродкаў для фінансавання «партыйна-палітычна матываваных, часам маніпуляваных апытанняў, якія праводзяцца кампаніяй па вывучэнні грамадскай думкі ў інтарэсах палітычнай партыі і яе вышэйшай службовай асобы» ў 2016-18 гадах. Вынікі такіх апытанняў публікаваліся ў газеце, не маркіруючыся як рэклама.
reform.by