Маштабны лакдаўн у Кітаі: супрацоўнікі ночаць на прадпрыемствах, каб працягваць працу

Уведзеныя ўладамі Кітая беспрэцэдэнтныя абмежавальныя меры максімальна перашкаджаюць перамяшчэнню, таму кіраўнікі вымушаныя прасіць супрацоўнікаў фактычна жыць на працы, піша myfin.by.

Кітайская дзяржаўная газета Shanghai Observer у пачатку тыдня распавяла, што ў Шанхаі на заводзе кампаніі Siasun, якая з'яўляецца буйным вытворцам робататэхнікі, супрацоўнікі начуюць наўпрост на працоўных месцах з-за абмежаванняў на перамяшчэнне жыхароў. Каб паспець ажыццявіць запланаваныя пастаўкі, кіраўніцтва прадпрыемства звярнулася да рабочых з просьбай застацца на вытворчасці. На заклік адгукнуўся 91 працоўны — цяпер ім даводзіцца спаць у канферэнц-зале і пакоі адпачынку для персаналу прама на падлозе на кавалках кардона.

Прадстаўнік прадпрыемства распавёў журналістам, што рашэнне не спыняць вытворчасць падчас лакдаўна павінна прадухіліць "каскадны эфект" праблем з ланцужком паставак у будучыні.

У канцы сакавіка таксама паведамлялася, што больш чым 20 тысяч банкаўскіх служачых і іншых работнікаў з Шанхая вымушаныя начаваць у хмарачосах аднаго з найбуйнейшых фінансавых цэнтраў Азіі. Брокерскія, інвестыцыйныя і біржавыя кампаніі выклікалі ключавы персанал у офісы напярэдадні уведзенага 28 сакавіка ў горадзе каранціну. Папярэдне былі падрыхтаваныя спальныя мяшкі і прадметы першай неабходнасці для начлегу работнікаў на працоўных месцах.

Так што цяпер з COVID-19 ў Кітаі?

У КНР ужо некалькі тыдняў працягваецца самая сур'ёзная з пачатку пандэміі ўспышка каронавіруса, цэнтрам якой стаў 25-мільённы Шанхай. Адзначаецца, што колькасць зарэгістраваных у мегаполісе новых выпадкаў COVID-19 вырасла да больш чым 13 тысяч у дзень, а ў цэлым па краіне яно дасягае 20 тысяч.