МЗС Расіі заклікаў пераследаваць за мяжой зорак, якія падтрымалі Украіну, — Bloomberg
Расійскім спецслужбам быў патрэбны адзін гучны кейс, каб прадэманстраваць здольнасць дастаць каго заўгодна і дзе заўгодна. Для гэтага паспрабавалі скарыстаць музыкаў «Би-2».
Гурт «Би-2». Фота АГН «Москва»
Міністэрства замежных спраў Расіі запатрабавала ад сваіх дыпламатаў пераследаваць за мяжой расійскіх знакамітасцяў і дзеячаў культуры, якія выступілі супраць вайны ва Украіне і з'ехалі з РФ, піша «Медуза».
Пра гэта Bloomberg распавялі дзве крыніцы, знаёмыя з сітуацыяй.
З іх слоў, МЗС РФ патрабуе пераследаваць расійскіх знакамітасцяў у так званых дружалюбных краінах, кіраўніцтва якіх пасля поўнамаштабнага ўварвання войскаў РФ ва Украіну не асудзіла дзеянні Масквы.
Іншыя падрабязнасці распараджэння МЗС Расіі ў артыкуле Bloomberg не прыводзяцца.
У якасці аднаго з прыкладаў такога пераследу Bloomberg згадвае затрыманне «Би-2» у Тайландзе. Музыкаў аштрафавалі за канцэрты без дазволу на працу ў краіне і адправілі ў міграцыйную турму, каб вырашыць пытанне аб дэпартацыі.
Паведамлялася, што расійскія дыпламаты ў Тайландзе спрабавалі дамагчыся, каб удзельнікаў гурта, які выступаў супраць вайны, адправілі ў Расію. У выніку 31 студзеня музыкі паляцелі ў Ізраіль.
Сябар удзельнікаў гурта, палітык Дзмітрый Гудкоў распавёў «Дажджу», што супраць музыкаў «працавала ўся расійская дзяржаўная машына».
Глядзіце таксама
«Расійскім спецслужбам быў патрэбны адзін гучны кейс, каб прадэманстраваць здольнасць дастаць каго заўгодна і дзе заўгодна. Зрабіць так, каб многія музыкі і дзеячы культуры баяліся ездзіць у цэлы шэраг краін», — заявіў Гудкоў.
З ягоных слоў, прадухіліць дэпартацыю ўдзельнікаў групы «Би-2» у Расію дапамагла неверагодная ўдача, рэзананс, збег абставінаў і ўзаемадзеянне велізарнай колькасці людзей, у тым ліку дыпламатаў.
Амбасадар Расіі ў Тайландзе Яўген Таміхін адмаўляў, што Масква датычная да пераследу музыкаў «Би-2»: «Не ў нашай практыцы камусьці ўказваць».
Улады Тайланда заяўлялі, што затрыманне музыкаў не звязанае з палітыкай.
Глядзіце таксама
Кіраўнік МЗС Ізраіля Ісраэль Кац пракаментаваў сітуацыю з музыкамі «Би-2»: «Я рады, што дзякуючы разумнай і ўпартай дыпламатычнай працы нам удалося вызваліць грамадзян Ізраіля, арыштаваных у Тайландзе, разам з іх калегамі — замежнымі грамадзянамі. Усе яны на шляху ў Ізраіль і адчуваюць сябе добра. Хто ратуе адну душу, нібы выратаваў цэлы свет».
Затрыманне гурта «Би-2» стала адным з самых рэзанансных выпадкаў пераследу расійскіх артыстаў, якія выступілі супраць вайны.
У пачатку студзеня ў Тайландзе таксама адмянілі канцэрты стэндапераў Руслана Белага і Максіма Галкіна, якія выступілі супраць вайны ва Украіне. Паводле неафіцыйных даных, гэта было зроблена па асабістай просьбе генконсула Расіі ў Пхукеце Уладзіміра Саснова.
На іншым папулярным у расійскіх турыстаў востраве ў Паўднёва-Усходняй Азіі — на Балі — таксама адмянялі выступленні артыстаў з Расіі. «РБК» звязваў гэтыя падзеі з абмеркаваннем магчымага ўзмацнення жорсткасці візавага рэжыму для расіян і ўкраінцаў. Мясцовыя жыхары скардзіліся, што турысты з гэтых краін прыязджаюць не толькі адпачываць, але і займаюць працоўныя месцы ў сферы турызму і забаў. Максім Галкін казаў, што яму адмовілі ва ўездзе ў Інданэзію на патрабаванне расійскіх уладаў.