Найстарэйшая гейша Японіі: "Я буду гейшаю ўсё жыццё"

Зрабіць адмысловы мэйк-ап и выйсці з дому ўва ўсёй красе — штодзённасць японскай гейшы Юко Асакуса, якой споўніўся усяго толькі 91 год, як кажа яна сама.



Юко — найстарэйшая гейша ў Токіа — больш не танчыць, але запэўнівае, што спяваць і граць на японскім народным інструменце сямісэн будзе, пакуль дыхае.
 



«Нягледзячы ні на што, я люблю выступаць. Мне падабаецца граць на сямісэн і скакаць. Я не назаву гейшаю тую, якой бы не падабалася выступаць. Я буду гейшаю ўсё жыццё, бо ў гэтай прафесіі ўзрост не такі істотны», — празналася гейша.



Хоць цяпер Асакуса ўсё ж больш займаецца з маладымі, пераказваючы ім азы прафесіі. Гейша мусіць лёгка і нязмушана займаць кліентаў дасціпнымі размовамі — у тым ліку і на замежных мовах, правільна праводзіць чайную цырымонію, выконваць традыцыйныя японскія танцы, быць начытанаю і разбірацца ў мастацтве, і пры гэтым заўсёды выглядаць прывабна і акуратна. 



Цяпер у Японіі гейшаў усё менш: на увесь густанаселены Токіа — толькі 2 сотні. Затое попыт на сапраўдных гейшаў, а не на дзяўчат у кімано, якія адно фатаграфуюцца з турыстамі, не зніжаецца. У графіку Юко Асакуса каля 20-ці сустрэчаў з кліентамі на месяц.



Марына Вашкевіч, belsat.eu

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: