Новага прэзідэнта Бразіліі абвінавацілі ў датычнасці да карупцыі

Прэзідэнта Бразіліі Мішэля Тэмера абвінавацілі ў здзяйсненні ціску на кабінет міністраў і датычнасці да карупцыі.

Калер і Тэмер. Калера (злева) сышоў з пасады, перш чым вылучыць абвінавачванні супраць калегаў. Фота EPA

Калер і Тэмер. Калера (злева) сышоў з пасады, перш чым вылучыць абвінавачванні супраць калегаў. Фота EPA


Былы міністр культуры Марсела Калера сцвярджае, што Тэмер прасіў яго дапамагчы іншаму міністру ў бізнес-пагадненні.

Па словах Калера, ад яго патрабавалася даць дазвол на будаўніцтва элітнага жылля на ўчастку ў гістарычным раёне Сальвадора, які належыць сакратару па справах ўрада канцылярыі прэзідэнта Жэдэлю Віейра Ліме.

Былы міністр, які пайшоў у адстаўку на мінулым тыдні, раней заблакаваў праект забудовы. Калера распавёў паліцыі, што і прэзідэнт, і міністр ціснулі на яго, патрабуючы змяніць рашэнне.

Прэзідэнт Тэмер адмаўляе ўсе абвінавачванні, хоць прызнае, што размаўляў з Калера пра забудову.

Раней на гэтым тыдні панэль па этыцы вырашыла пачаць расследаванне ў дачыненні да Лімы ў сувязі з гэтымі абвінавачваннямі. Тады пра магчымае дачыненне да скандалу прэзідэнта яшчэ не было вядома.

Нагадаем, Тэмер прыйшоў да ўлады ў гэтым годзе, пасля таго як прэзідэнту Дзілме Русэф быў абвешчаны імпічмент на фоне палітычнага крызісу, які зацягнуўся. Ён абяцаў скончыць з карупцыяй у краіне.

Паводле ВВС