Расійскія кантрактнікі збеглі з палігона з-за страху, што іх адправяць на Данбас

Некалькі дзясяткаў расійскіх кантрактнікаў з в/ч № 22179 33-й асобнай мотастралковай брыгады (Майкопская выведвальная брыгада) збеглі з палігона ў Растоўскай вобласці, бо спалохаліся адпраўкі ў Данбас.



Супраць іх заведзеныя крымінальныя справы, ім пагражае да 10 гадоў пазбаўлення волі за самавольнае пакіданне частак і дэзерцірства. Ваенныя і іх сваякі распавялі, што жылі ў нечалавечых умовах і іх агітавалі паехаць добраахвотнікамі ў Данбас, пра гэта гаворыцца ў расследаванні выдання Газета.Ru.

Па версіі следства, кантрактнікі пакінулі палігон "Кадамоўскі", "не жадаючы пераносіць нягоды і пазбаўленні ваеннай службы". Зараз усе гэтыя кантрактнікі, а гэта некалькі дзесяткаў чалавек, пад следствам па арт. 337 КК РФ ("Самавольнае пакіданне часткі", да 5 гадоў пазбаўлення волі) і арт. 338 КК РФ ("дэзерцірства", тэрмін да дзесяці гадоў).

Намеснік гендырэктара ТАА "Першы аб'яднаны саюз юрыстаў Кубані" Таццяна Чарнецкая, якая прадстаўляе інтарэсы пяці кантрактнікаў, супраць якіх заведзеныя крымінальныя справы, распавяла выданню, што, па яе дадзеных, размова ідзе пра дзясяткі крымінальных спраў у дачыненні да тых, хто пакінуў палігон вайскоўцаў.

"Камандзір часткі, перадаюць хлопцы, заяўляе: ваенна-следчы аддзел не спраўляецца, столькі крымінальных спраў. Хлопцам прысвойваюць нумары 101, 137 у чарзе на завядзенне крымінальных спраў, атрымліваюць нумар і чакаюць выклік да следчага", — сцвярджае яна.

Мяркуючы па афіцыйнай статыстыцы Майкопскага гарнізоннага суда, за першыя паўгода 2015-га па артыкуле 337 КК РФ ч. 4 (самавольнае пакіданне часткі) асуджана 62 вайскоўцаў. Пры гэтым за папярэднія пяць гадоў — з 2010 па 2014 год — было вынесена амаль у два разы менш пастаноў, усяго 35.

Па словах Чарнецкай, у некалькіх дзесяткаў кантрактнікаў, у дачыненні да якіх распачаты справы па артыкулах "дэзерцірства" і "самавольнае пакіданне часткі", аднолькавыя абставіны: у адзін і той жа час з канца верасня па сярэдзіну лістапада яны пакінулі палігон "Каданоўскі", тлумачачы гэта нечалавечымі ўмовамі і дакучлівымі прапановамі служыць на тэрыторыі "ЛНР" - "ДНР" добраахвотнікамі.

"Ніхто ваяваць у Данбасе не хацеў ні за 8 тысяч у дзень, якія абяцалі рекруцёры, ні за 28. Вайскоўцы беглі з "Кадамоўскага". Нехта прасіў грошы ў родных, іншыя дабіраліся перакладнымі, аўтастопам. Па прыездзе ў частку яны падавалі рапарт на звальненне, але іх проста не разглядалі", — сцвярджае Чарнецкая.