Туніс увёў смяротнае пакаранне за тэрарызм

Папраўкі ў заканадаўства таксама прадугледжваюць турэмнае зняволенне за публічнае апраўданне тэрарызму, дазваляюць затрымліваць падазраваных на тэрмін да 15 дзён без санкцыі суду і доступу адваката і палягчаюць спецслужбам праслухоўванне тэлефонных размоў.



Насуперак пратэстам праваабаронцаў, якія ўказвалі, што паняцце «тэрарызм» прапісана ў новым законе недастаткова выразна, туніскі парламент пасля трох дзён дэбатаў ухваліў папраўкі пераважнай большасцю.
На думку спікера Махамеда Энасера, яны ўзмоцняць упэўненасць грамадзян у сваёй бяспецы.
26 чэрвеня ўзброены злачынца адкрыў агонь па адпачывальніках на пляжы ў курортным горадзе Сус, забіўшы 38 чалавек. 18 сакавіка 21 турыст стаў ахвярай атакі на музей Бардо ў сталіцы краіны. Віна за абодва напады ўскладаецца на баевікоў «Ісламскай дзяржавы».
Паводле "Нашай Нівы"