У Нідэрландах знойдзены новы, небяспечны варыянт ВІЧ

Навукоўцы Оксфардскага ўніверсітэта выявілі ў Нідэрландах 17 выпадкаў заражэння новым небяспечным варыянтам віруса імунадэфіцыту чалавека — больш заразным (гэта значыць лягчэй перадаецца ад чалавека да чалавека). Ён аказвае яшчэ больш разбуральнае ўздзеянне на здароўе.

Пры заражэнні ВІЧ вірус разбурае клеткі імуннай сістэмы хворага (CD4). У выніку яго імунная абарона паступова слабее, і рана ці позна інфікаваны аказваецца безабаронны перад любымі патагенамі. Шкоднасныя грыбкі, вірусы і бактэрыі размножваюцца ў арганізме хворага, не сустракаючы практычна ніякага супраціву, і тады хвароба пераходзіць у СНІД.
Звычайна ў адсутнасць неабходнай тэрапіі імунная абарона хворага паступова слабее і на працягу 6-7 гадоў сходзіць на нішто. Новы варыянт ВІЧ, які атрымаў назву VB, прыводзіць да таго ж выніку амаль утрая хутчэй — усяго за два-тры гады.
Адна з прычын такога імклівага развіцця — незвычайна высокая вірусная нагрузка, гэта значыць канцэнтрацыя ў крыві хворага вірусных часціц. У пацыентаў, заражаных варыянтам VB, яна перавышае паказчыкі "звычайнага" віруса ў тры-пяць разоў.
Даследаванне, вынікі якога апублікаваны ў часопісе Science, выявіла 17 носьбітаў новага варыянту віруса: 15 пацыентаў з Нідэрландаў, адзін са Швейцарыі і адзін з Бельгіі. Расшыфроўка віруснага геному выявіла мноства мутацый, якія былі раскіданыя па ўсім ланцужку РНК.
Аўтары даследавання ўдакладняюць, што антырэтравірусныя прэпараты, якія блакуюць размнажэнне віруса ў арганізме, выдатна працуюць і супраць варыянту VD, так што, па іх словах, падставы для панікі няма.
Па даных СААЗ, на планеце жыве амаль 38 млн чалавек, якім афіцыйна пастаўлены дыягназ ВІЧ, аднак эксперты не сумняваюцца, што насамрэч інфікаваных на парадак больш. З пачатку эпідэміі вірус забраў па розных падліках ад 27 да 48 млн чалавек.
ВВС