Як вырабіць 0 (нуль, ні аднаго, зеро) камбайнаў за месяц і... павялічыць складскія запасы

У маі ў краіне не сабрана ніводнага камбайна збожжаўборачнага. На складах чакаюць пакупнікоў 184 камбайна. Па такіх тэмпах працы гэтага дабра хопіць да жніўня 2016 года.



Пра гэта піша блогер Віктар Малішэўскі.

Калі на тэмпы продажу камбайнаў у апошнія два месяцы (красавік-май) паглядзець, то лепш не глядзець. У красавіку сабралі 2 (два) камбайны, у маі — ніводнага. А на складах колькасць камбайнаў павялічылася з 179 да 184. Сабралі — два камбайны, на склад паставілі — пяць. І такое бывае, так.

Напрыклад, у маі мінулага года краіна збірала 147 камбайнаў, а за ўвесь мінулы год — 847. Цяпер жа, за чатыры месяцы — люты, сакавік, красавік, май — сабрана 11 (!) камбайнаў збожжаўборачных. Дзякуючы такой ненапружанай працы атрымалася з пачатку года знізіць запасы на складах на 75 камбайнаў (сабраўшы пры гэтым 64).

Знізіў складскія запасы (у штуках) і Трактарны завод. Адразу на 1,4 тысячы трактароў. За пяць месяцаў года тут вырабілі 16,4 тысячы трактароў, на складах застаецца 8 600. Гэта мала! Толькі вось за пяць месяцаў 2014-га года МТЗ збіраў 25 700 трактароў. Але запасы ў штуках упалі? Упалі!

І складскія запасы тэлевізараў — з 15,4 тысяч штук у маі 2014 года да 7 800 — сёння. Вытворчасць таксама за тое — з 49 800 штук у студзені-траўні–2014 да 14,8 тысяч — сёння.

259 айчынных аўтобусаў прададзена з пачатку года, а выраблена 285. Склады выраслі ўсяго на 7 няшчасных аўтобусаў. Але ў 2014-м збіралі ў два разы больш — 596 аўтобусаў.

І грузавікоў вырабілі 1 466, прадалі 1 736, што вельмі нядрэнна і на складах прыкладна столькі ж грузавікоў, як у чэрвені 2014 года. Але зноў год таму за пяць месяцаў збіралі 3 281 грузавік. У 2,2 разы больш, так.

«Нягледзячы на затрымкі заробкаў і няпоўны працоўны тыдзень, працаўнікі «Гомсельмаша» вераць у светлую будучыню», — паведамляе тэлеканал СТВ.