Няма куды прадаваць. Беларускія НПЗ працуюць з мінімальнай загрузкай

Беларускія ўлады так і не змаглі арганізаваць перавалку нафтапрадуктаў, якія вырабляюцца на мясцовых НПЗ, праз расійскія порты для наступнага экспарту, і былі вымушаныя знізіць загрузку заводаў да ўзроўню пакрыцця ўнутраных патрэбаў на паліва.

Аб гэтым сёння паведаміў прэм'ер РБ Раман Галоўчанка, паведамляе АФН.

«Для беларускіх нафтаперапрацоўчых заводаў ва ўмовах узмацнення жорсткасці санкцый, фактычна блакавальных санкцый, зыходзім з задачы па забеспячэнні ўнутранага рынку. У сувязі з чым збалансавана іх загрузка. У далейшым па меры стабілізацыі сітуацыі і павелічэння экспарту загрузка заводаў будзе ўзрастаць», — паведаміў Галоўчанка, якога цытуе прэс-служба ўрада.

Па словах прэм'ера «Нафтан» цяпер перапрацоўвае 11,7 тыс. т у дзень, Мазырскі НПЗ — 13,7 тыс. т у дзень. У звычайныя «нафтастабільныя» часы загрузка аднаго беларускага НПЗ складала 24 тыс. тон у суткі.

Ён таксама паведаміў, што ААТ «Гродна-Азот» «цалкам загружаны для пастаўкі ўгнаенняў на ўнутраны рынак». Экспартныя пастаўкі будуць «ажыццяўляцца кропкава для адпрацоўкі лагістыкі і праходжання плацяжоў».

«Паўнавартасныя пастаўкі на знешнія рынкі, у тым ліку ў Расію, пачнуцца ў чэрвені», — сказаў Галоўчанка.