Стала вядома на колькі падаражэе бензін на запраўках

«Белнафтахім» хоча зрабіць цэны на аўтамабільнае паліва ў Беларусі прынамсі як у Расіі.

Напрыканцы 2017-га барэль нафты стаў каштаваць каля $ 64 за барэль (у жніўні кошт быў каля $ 50). Пра ўплыў гэтага на працу беларускіх НПЗ заявіў намеснік старшыні канцэрну Андрэй Рыбакоў.
«Павелічэнне кошту сыравіны непазбежна прыводзіць да павелічэння цаны гатовага прадукту, – сказаў Рыбакоў. – Для кампенсацыі стратаў НПЗ ад росту катыровак нафты цэны на нафтапрадукты неабходна павялічыць на 23 %», – адзначыў Андрэй Рыбакоў.
Даражэйшае за беларускае паліва не толькі ў Польшчы ці Літве, але таксама ўва Украіне (на 48–68 %) ды сумежных вобласцях Расіі (бензін – амаль на 15 %, дызель – каля 11 %).
«Рэнтабельнасць вытворчасці і рэалізацыі маторнага паліва на ўнутраным рынку Беларусі стала адмоўнай. Каб беларускі спажывец і далей атрымліваў якасны айчынны бензін і дызельнае паліва, неабходна забяспечыць іх прыбытковую працу і дастатковуае фінансаванне завяршэння мадэрнізацыі заводаў, накіраванай на павелічэнне выхаду светлых нафтапрадуктаў», – заявіў Рыбакоў.
Паводле Рыбакова, канцэрн лічыць неабходным як мінімум прывесці беларускія цэны на аўтамабільнае паліва да парытэту з коштамі расійскага рынку.
Паводле belsat.eu