Адабралі ліцэнзію ў Яўгена Пыльчанкі, апошняга адваката Віктара Бабарыкі

28 кастрычніка ўвечары адбылося пасяджэнне дысцыплінарнай камісіі Мінскай гарадской калегіі адвакатаў, на якім разглядалася справа Яўгена Пыльчанкі, апошняга абаронцы Віктара Бабарыкі, піша «Свабода».

Камісія прыняла рашэнне выключыць з адвакатуры Пыльчанку-малодшага — нібыта за сістэматычныя парушэнні заканадаўства аб адвакатуры.

Раней, 19 кастрычніка, паводле загада міністра юстыцыі ў дачыненні да Яўгена Пыльчанкі была распачатая дысцыплінарная вытворчасць і яго адхілілі ад працы.

У чацвер на пасяджэнне з'явіліся 7 чальцоў камісіі, старшыняваў Аляксандар Пятровіч. Пасяджэнне доўжылася паўтары гадзіны. Як галасавалі, невядома, бо рабілася гэта ў адмысловым пакоі для нарад, у адсутнасць Пыльчанкі, расказаў сам Яўген.

«Камісія вынесла даволі вялікую пастанову на 7 альбо 8 аркушах — яны не пранумараваныя. Асноўных прэтэнзій дзве.

Першая — нібыта я ў рэпліках падчас судовых спрэчак па справе Віктара Бабарыкі даў ацэнку выступленням іншых адвакатаў. То-бок за тое самае, за што выключылі Дзмітрыя Лаеўскага.

А другое — за тое, што я абараняў адначасова Віктара Бабарыку і Святлану Купрэеву, сяброўку яго сям’і. І нібыта ў іх быў канфлікт інтарэсаў: КДБ даслаў ліст, што ёсць канфлікт інтарэсаў — без абгрунтаванняў і прадастаўлення дакументаў. Насамрэч ніякага канфлікту інтарэсаў там няма. Ні следства, ні суд цягам 1,5 года ніякіх мне прэтэнзій не выказвалі. І няма ніякіх дакументаў, якія б пацвярджалі, што канфлікт інтарэсаў ёсць. Дысцыплінарная камісія паверыла КДБ, а не мне. І вырашыла, што я парушыў прафесійную этыку», — распавёў Яўген Пыльчанка.

Адвакатам Яўген Пыльчанка працуе з 2012 года, з 2018 — у адвакацкім бюро «Лаеўскі і партнёры».

Пыльчанка абараняў экс-банкіра Віктара Бабарыку, сяброўку сям’і Бабарыкаў Святлану Купрэеву, свайго калегу Максіма Знака.

Цяпер у Віктара Бабарыкі няма аніводнага з шасцярых адвакатаў. Максім Знак асуджаны на 10 гадоў, Ілля Салей з'ехаў з Беларусі, Аляксандра Пыльчанку пазбавілі ліцэнзіі яшчэ больш за год таму, Дзмітрыя Лаеўскага — у ліпені 2021 года, Наталлю Мацкевіч адхілілі ад працы 13 кастрычніка, а 25 кастрычніка выключылі з калегіі. І вось цяпер пазбаўлены ліцэнзіі апошні адвакат Бабарыкі Яўген Пыльчанка.

Паводле непацверджанай афіцыйна інфармацыі з дасведчанай крыніцы, страціў адну са сваіх адвакатак і сын Віктара Бабарыкі Эдуард, якога ўжо амаль паўтара года трымаюць у так званай «амерыканцы» — СІЗА КДБ. Абаронца Эдуарда 28 кастрычніка была выклікана ў Міністэрства юстыцыі на пазачарговую атэстацыю, якую нібыта не прайшла. У Бабарыкі-малодшага засталася яшчэ адна адвакатка.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: