Арыштавалі зааабаронцу Алену Мірашнічэнка
Алена — вядомая ў Оршы зааабаронца. Ініцыятыва «Хвосцікі», у якой удзельнічае Алена, штомесяц дапамагае дзясяткам бадзяжных жывёл.
Пару дзён таму Алене Мірашнічэнка даслалі павестку з пазнакай, што супраць яе распачата адміністрацыйная справа. Сёння днём яна па павестцы з'явілася ў міліцыю — і там яе арыштавалі.
Наколькі вядома праваабаронцам, Алену Мірашнічэнка абвінавацілі ў правядзенні несанкцыянаванага масавага мерапрыемства.
Адразу ж адбыўся і суд. Алену асудзілі на 15 сутак.
Падобна, што прычынай затрымання стала тое, што Алена ў двары аднаго з дамоў правяла забаўляльна-адукацыйную сустрэчу з жыхарамі дома, каб патлумачыць, як правільна абыходзіцца з бадзяжнымі жывёламі.
Такім чынам, караецца любая грамадская актыўнасць, нават калі яна і блізка не звязана з палітычнай дзейнасцю. А да масавых мерапрыемстваў улады могуць адносіць любыя сустрэчы людзей.