«Атрымаў 10 тысяч лістоў!» Выйшаў на волю палітвязень Аляксей Раманаў, у якога анкалагічнае захворванне

23 лістапада з калоніі ў Глыбокім пасля адбыцця пакарання вызваліўся Аляксей Раманаў, паведамляе «Свабода».

Ён адбываў пакаранне за «абразу Лукашэнкі», мае інваліднасць па анкалагічным захворванні.

«Усё слава Богу! Ставіліся да мяне ў калоніі добра. Са здароўем таксама больш-менш. Еду дахаты. Я ў калоніі атрымаў за гэты час 10 тысяч лістоў! Гэта мяшок вялізны, на жаль, я столькі не мог забраць з сабой», — распавёў па вызваленні Аляксей.

Аляксей Раманаў — жыхар Гомеля, як валанцёр ён працаваў у камандзе Святланы Ціханоўскай, удзельнічаў у агітацыі. На пікеце ў Хойніках Аляксей выказаўся пра Аляксандра Лукашэнку. Следства і суд трактавалі гэта як «абразу прэзідэнта». На судзе Аляксей зазначыў, што прэзідэнта ён не абражаў, а грамадзянін Лукашэнка для яго не прэзідэнт. Суд пакараў яго 1 годам зняволення.

Адбываў пакаранне Аляксей Раманаў у калоніі ў Глыбокім. Там у яго адбыўся рэцыдыў хваробы. Ён лекаваўся ў рэспубліканскім турэмным шпіталі.