Аўтуховіча шпіталізавалі з гіпертанічным крызам
Сёння раніцой хуткая дапамога забрала Мікалая Аўтуховіча з працы.
Мікалай Аўтуховіч моцна расхваляваўся 5 жніўня, калі Гродзенскі абласны суд адмяніў рашэнне Ваўкавыскага раённага суда ад 17 ліпеня, паводле якога органам міліцыі адмаўлялася ў падаўжэнні прэвентыўнага нагляду за ім.
— У мяне вельмі высока скочыў ціск. Яшчэ ўчора перахваляваўся з гэтымі суддзямі, бо ніяк нельга было выносіць такое беспадстаўнае рашэнне. А яшчэ ўчора ў 22.20 прынеслі мне позву ў суд. А сёння прыйшоў на працу, і мне стала дрэнна, пачало ванітаваць, балела галава, і дырэктарка выклікала хуткую. Цяпер ляжу ў шпіталі, а мой адвакат пайшоў у суд, і я пакуль нічога ня ведаю, што там будзе далей. Хоць думаю, што могуць справу разгледзець і без мяне, у нашай краіне магчымы і такі варыянт, - расказаў "Радыё Свабода" Аўтуховіч.
6 жніўня ў Ваўкавыскім раённым судзе ў 11.30 павінен быў адбыцца паўторны суд, каб працягнуць прэвентыўны нагляд над Аўтуховічам. Гэта стала магчымым пасля ўчарашняга рашэння Гродзенскай абласной калегіі. Сёння ж — дзень, калі тэрмін прэвентыўнага нагляду над Міколам Аўтуховічам сканчаецца. І таму, паводле яго, улады любым чынам імкнуцца правесці гэты суд, каб падоўжыць тэрмін прэвентыўнага нагляду за ім.