Да 5 гадоў калоніі. Вынесены прысуд 10 берасцейцам па справе «пудзілаў-рэек»

У судзе Ленінскага раёна Брэста 18 траўня вынесены прысуд па крымінальнай справе за наўмыснае прывядзенне ў непрыдатнасць транспартнага сродку або шляхоў зносін (артыкул 309 Крымінальнага кодэкса), а таксама за развешванне пудзілаў у абласным цэнтры (ч. 2 артыкула 339 — «Хуліганства, здзейсненае групай асоб») і падпал аўтапакрышак.

Справу разглядаў суддзя Семянчук. Усяго па справе праходзілі дзесяць чалавек, піша «Вясна».

Ім ставіліся ў віну некалькі эпізодаў: вывешванне пудзілаў у розных месцах горада, закідванне яйкамі і камянямі апорнага пункту міліцыі, падпал ноччу на бязлюднай вуліцы аўтамабільных пакрышак, размаляваны кіёск «Табакерка». Усё гэта расцэнена як «злоснае хуліганства» (ч. 2 арт. 339 КК), «асабліва злоснае хуліганства» (ч. 3 арт. 339 КК). Таксама ставіцца ў віну злачынства па ч. 1 ст. 309 КК («Наўмыснае прывядзенне ў непрыдатнасць транспартнага сродку або шляхоў зносін») за замыканне чыгуначных рэек металічнай дротам.

На стадыі судовых спрэчак абвінавачанне па ч. 3 арт. 339 КК было перакваліфікавана на ч. 2 арт. 339 (гэта значыць, з «асабліва злоснага хуліганства» на «злоснае хуліганства»). Абвінавачанне паводле арт. 309 КК за замыканне рэек дротам засталося.

Суддзя Семянчук 18 траўня прызнаў усіх вінаватымі і вынес наступныя пакаранні:

Камбулю Яўгену — 5 гадоў калоніі агульнага рэжыму;

Сяргею Сілічу — 4 гады калоніі агульнага рэжыму;

Сілюку Максіму — 2 гады 6 месяцаў калоніі агульнага рэжыму;

Пыцелю Максіму — 3 гады калоніі агульнага рэжыму;

Сыраватка Вользе — 2 гады калоніі агульнага рэжыму;

Барынавай Наталлі — 1 год калоніі агульнага рэжыму;

Муратава Наталля — 1 год калоніі агульнага рэжыму;

Красоўскаму Сяргею — 2 гады калоніі агульнага рэжыму;

Кацюбку Уладзіміру — 1 год 6 месяцаў калоніі агульнага рэжыму;

Сілянок Марыне — 1 год 6 месяцаў «хіміі».

За якія дзеянні іх прызналі вінаватымі:

- блакаванне рэек з дапамогай дроту;

- размалёўванне кіёска «Табакерка»;

- вывешванне некалькіх пудзілаў. На іх былі лісты з надпісамі «мент», «АМАП», «хлус нумар адзін»;

- падпал ноччу на пустой дарозе 3 пакрышак;

- закідванне яйкамі і камянямі апорнага пункта міліцыі;

- нанясенне «пратэсных» надпісаў на плот («97%», «Верым, можам, пераможам», «"не" фашызму» і іншых).