Эксперт: «На нашым «Тытаніку» вада хвастае, а капітану прапануюць яго пафарбаваць у апельсінавы колер»

Улады вырашылі заняцца прасоўваннем брэнда Рэспублікі Беларусь. Эксперт параўнаў сітуацыю з афарбоўкай карабля, які тоне.

У адпаведнасці з распараджэннем прэм'ер-міністра створана міжведамасная рабочая група для распрацоўкі дарожнай карты па стварэнні і прасоўванні брэнда Рэспублікі Беларусь. Да мая 2021 года плануецца завяршыць гэтую працу.

Эксперт па маркетынгавых камунікацыях і сістэмнаму развіццю бізнеса Аляксандр Колб уразіўся такой «своечасовасцю» ідэі.

— Дык брэнд ужо быў сфармаваны ў другой палове 2020 года, — цытуе Аляксандра Колба «Салідарнасць» са спасылкай на «Прымус». — І ўсюды Беларусь ужо гучыць у адмоўным ключы.

Цяпер займацца стварэннем і распрацоўкай вобразу Беларусі, на думку эксперта, абсалютна бесперспектыўна.

— Гэта як у сітуацыі з «Тытанікам», калі ён сустрэўся ўжо з айсбергам, ужо вада хвастае па трох-чатырох палубах, ужо пачалася эміграцыя з Беларусі, дакладней пасадка пасажыраў на шлюпкі, а хтосьці там з марскіх афіцэраў прапануе капітану: «Чуеш, капітан, а давай мы наш «Тытанік» пафарбуем у радасны апельсінава-аранжавы колер». Хлопцы, карабель б выратаваць! — адзначае эксперт.

Самым дурным ў гэтай сітуацыі будзе марнаваць сродкі на перакананне ўсёй планеты. Таму што гэта не дапаможа.

— Пакуль нешта карэнным чынам у Беларусі не памянялася — я нават не кажу пра змену ўлады, пра вяршэнства законаў, — пакуль няма асноватворнага падмурка, казаць, што давайце мы зробім прыгожа, банцікі і рушачкі павесім на вобраз Беларусі, гэта няправільна.

Пры гэтым Аляксандр Колб лічыць, што сёння ёсць два абсалютна розныя брэнды: самі беларусы і асобна Рэспубліка Беларусь.

— Гэта два розных паняцці. Я думаю, што падзеі з сярэдзіны 2020 года — пачатку 2021 года паказалі ўсяму свету, што ў Беларусі ёсць выдатныя людзі, таленавітыя, разумныя бясстрашныя людзі. І ёсць іншы бок медаля, як інь і янь, белае і чорнае, — гэта тая частка, якая жыве ідэямі і думкамі 19 — пачатку 20 стагоддзя. Яны думаюць, што можна ўсё зарэгуляваць, што калі аддаць загад палепшыць эканоміку і падняць інвестыцыйную прывабнасць і прысвяціць гэтаму адзін-два ці дзесяць указаў, напісаць пяць пастаноў, то гэта ўсё так і будзе, — адзначае эксперт.

Аднак, лічыць Аляксандр Колб, усё роўна развіццё цывілізацыі пераможа:

— Мы цяпер жывем у адным з такіх знакавых, цікавых і пераломных момантаў, калі, усе тыя, хто сёння хоча жыць па канонах 21 стагоддзя, а не ў 19, прарвуцца вонкі, вызваляцца ад гэтых дрымучых, камуністычных саўковых кайданоў, і нарэшце Беларусь зойме годнае месца ў свеце.