Гандбольны клуб «Віцязь» пачаў краўдфандынгавую кампанію

На платформе Talaka.by клуб плануе сабраць 10 000 беларускіх рублёў.

Мінскі гандбольны клуб «Віцязь» пачаў краўдфандынгавую кампанію на платформе Talaka.by. Сабраныя сродкі будуць выдаткаваныя на набыццё неабходнай экіпіроўкі і іншых рэчаў, якія будуць выкарыстоўцца ў трэніровачным і гульнявым працэсе, паведамляецца на сайце клуба.

Вось што пра каманду гаворыцца ў апісанні краўдфандынгавай кмпаніі на «Талацэ»:

— Сення гандбольны клуб «Віцязь» — гэта ўпэўненая паўпрафісійная каманда з добра пастаўленым і рэгулярным трэніровачным працэсам.

Каманду ўзначальвае адзін з самых таленавітых беларускіх гульцоў свайго часу — майстар спорту, срэбраны прызёр маладзёвага чэмпіятана Еўропы, былы гулец зборнай Беларусі Андрэй Барвіюк.

Так, вядома, што мы яшчэ далёка не лідары чэмпіяната і пакуль не ведаем смак перамогі. Але мы добра аналізуем сваю стратэгію, вельмі шмат працуем і ўпэўнены, што здольныя зрабіць сур’ёзны крок наперад. У нас ёсць выдатныя гульцы, самааданыя валанцёры і вялікая ідэя.

Але нават такое наша сціплае выступленне ў вышэйшай лізе было б немагчыма без падтрымкі партнёраў ( у тым ліку Беларускай федэрацыі гандбола), спонсараў і простых людзей. Наша моц — у вялікай супольнасці, дзе кожны па дробязі робіць свой унёсак у развіццё цікавага і незвычайнага праекта. 

Акрамя ўсяго, клуб «Віцязь» сярод іншых вылучае прыхільнае стаўленне да беларушчыны. ​Усе інфармацыйная рэсурсы каманды вядзуцца выключна па-беларуску.

Раней збор сродкаў праз «Талаку» ладзіў футбольны клуб «Крумкачы».

Паводле gazetaby.com