«Гавары праўду» перафарматуецца ў «Робім разам»

Пасля 11 гадоў працы па рашэнні Вярхоўнага суда была пазбаўлена рэгістрацыі кампанія «Гавары праўду». Але яе ўдзельнікі вырашылі стварыць арганізацыю-пераемніка з беларускамоўнай назвай «Робім разам», паведаміў кіраўнік «Гавары праўду» Андрэй Дзмітрыеў.

На сваёй старонцы ў Фэйсбуку Андрэй Дзмітрыеў распавёў, што ўчора адбыліся два з'езды: «на адным падвялі рысу пад мінулым, а на другім зрабілі крок у будучыню».
«Прыгадаць ёсць што, 3 кандыдаты ў прэзідэнты, сотні кандыдатаў у парламент і мясцовыя саветы, сотні тысяч сабраных намі подпісаў грамадзян за перамены на месцах і ў краіне ў цэлым. Распрацаваныя і рэалізаваныя канцэпцыі татальнага ўдзелу і мірных перамен. І многае іншае. Як кажуць, мы набліжалі Дзень Перамогі, як маглі», — напісаў Дзмітрыеў.
Па яго словах, учора на з'ездзе быў сфарміраваны аргкамітэт арганізацыі-пераемніка «Гавары праўду». Працоўная назва — «Робім разам». Устаноўчы з'езд арганізацыі запланаваны на сакавік. 
«Цяпер у нас два аргкамітэты: партыі “Наша партыя”, для тых, хто хоча ўдзельнічаць у палітыцы і грамадскай арганізацыі “Робім разам” для тых, каму цікавая сацыяльная, грамадская праца. Можна быць у абодвух ці абраць нешта адно», — адзначыў Андрэй Дзмітрыеў.