Хронікі рэпрэсій. Стала вядома, навошта сілавікі прыходзілі ў «Белагра». Прычына вас не здзівіць

Сабралі інфармацыю ад праваабаронцаў і з медыя пра палітычны пераслед беларусаў 29 верасня.

1654685029_vystavka_belagro_2022.jpg

Сёння сілавікі прыйшлі з ператрусам у кампанію «Белагра». Пазней стала вядома, што гэта было звязана з тым, што ў 2020 годзе яе супрацоўнікі падтрымалі пратэст.

Пра гэта ў «пакаяльным відэа» сказаў затрыманы супрацоўнік кампаніі Кірыл Малянтовіч. Таксама ён «прызнаецца» ў тым, што быў падпісаны на «экстрэмісцкія» тэлеграм-каналы і пакідаў у іх абразлівыя каментарыі.

Суд Цэнтральнага раёна Мінска яшчэ 26 верасня асудзіў 54-гадовую Вольгу Кавалёву да трох гадоў калоніі паводле трох крымінальных артыкулаў: 369 («Абраза прадстаўніка ўлады»), 368 («Абраза суддзі»), 364 («Пагроза гвалту ў адносінах да супрацоўніка міліцыі»). Вядома, што пракурор запрошваў для жанчыны два гады зняволення, але суддзя Дзмітрый Карсюк вынес больш жорсткае пакаранне — тры гады калоніі.

Вольгу затрымалі 17 траўня ў Мінску, і з таго часу яна знаходзілася пад вартай.

Паводле слоў жонкі палітвязня Алены Гундар, увечары 17 верасня Уладзіміра Гундара змясцілі ў карцар на 10 сутак. Ён адмовіўся жыць у адной камеры з падселенымі да яго двума вязнямі «нізкага сацыяльнага статусу». У знак пратэсту Гундар абвесціў галадоўку на ўвесь тэрмін спагнання. Днямі палітвязень выйшаў з карцара, паведаміла Алена.

«Валодзю вось выпусцілі з карцара, 10 сутак адбыў, адгаладаў, а зараз, дзякуй Богу, з учарашняга вечара ён пачаў паціху есці і папрасіў мяне, каб я прывезла яму сала, вострага перцу, апроч салодкага, і масла».

Нагадаем, у будынку гродзенскай турмы 18 траўня пачаўся суд над фігурантамі «справы Аўтуховіча», сярод якіх — палітзняволены баранавіцкі актывіст Уладзімір Гундар, які мае інваліднасць.

Сёння ў судзе Партызанскага раёна Мінска разгледзелі справу жонкі пастара царквы «Новы запавет» Лідзіі Івановай, якая знаходзілася пад вартай амаль тры месяцы. Яе абвінавацілі паводле арт. 342 Крымінальнага кодэкса за ўдзел у акцыях пратэсту ў 2020 годзе.

Лідзію затрымалі 5 ліпеня разам з мужам — пастарам мінскай евангельскай царквы «Новы запавет» Філіпам Івановым. Пазней мужчыну выпусцілі, а Лідзію перавялі ў СІЗА на Валадарскага, дзе ўтрымлівалі да суда.

Паводле інфармацыі «Хрысціянскай візіі», суддзя Міхаіл Макарэвіч прысудзіў дзяўчыне два гады абмежавання волі з накіраваннем у папраўчую ўстанову адкрытага тыпу («хіміі»). Яе вызвалілі ў зале суда.

Пракурор запрасіў для палітвязня Яўгена Батуры два гады «хіміі».

Судовы працэс у судзе Цэнтральнага раёна Мінска разглядае суддзя Вікторыя Шабуня. Батуру затрымалі за ўдзел у акцыі пратэсту ў 2020 годзе — у маршы МТЗ 14 жніўня. Яму прад'яўлена абвінавачванне па арт. 342 Крымінальнага кодэкса («Групавыя дзеянні, якія груба парушаюць грамадскі парадак»).

Стала вядома, што два жыхары Бабруйска знаходзяцца за кратамі па палітычных абвінавачаннях.

Як паведамляе @bobruisk_online, 5 жніўня затрымалі Віктара Дзіброва, ён знаходзіцца ў СІЗА №5. Вядома, што Віктар сірата і зараз без адваката. Прычынай затрымання стаў каментарый пра Лукашэнку.

На пачатку верасня быў затрыманы Уладзімір Зубец. Пасля некалькіх сутак у бабруйскім ІЧУ яго этапавалі ў СІЗА №1 у Мінск. Вядома, што Зубец абвінавачваецца ва ўдзеле ў паслявыбарчых маршах пратэсту.

Паводле інфармацыі праваабаронцаў, учора ў Мінску быў затрыманы адвакат Дзмітрый Пігуль. Яго затрымалі ўвечары дома супрацоўнікі КДБ. Меркавана, Дзмітрыю інкрымінуецца арт. 407 КК («Разгалошванне даных папярэдняга следства ці закрытага судовага пасяджэння»). Мужчына зараз знаходзіцца ў СІЗА КДБ.

Пігуль быў адвакатам на працэсе па справе «Буслы ляцяць», фігурантам якой учора вынеслі жорсткія прысуды. Акрамя гэтага, ён абараняў палітзняволеную Алену Маліноўскую, якая была асуджана разам з Анатолем Латушкам.

Сілавікі затрымалі ўладальніка бара «Білі Бонс» у Новай Баравой Паўла Клімянка.

На відэа затрыманы кажа аб тым, што са жніўня 2020 года быў падпісаны на «экстрэмісцкія» тэлеграм-каналы і рабіў рэпосты з іх.

«Таксама на момант 20 года ў маім бары збіраліся апазіцыйна настроеныя грамадзяне», — кажа Павел.

Праўладныя тэлеграм-каналы паведамляюць пра затрыманне Вадзіма Савіча. У 2020 годзе ён працаваў на чыгунцы і падчас адной з паездак вывесіў БЧБ-сцяг з акна. Акрамя таго, хлопец нібыта ўдзельнічаў у акцыях пратэсту і перакрываў рух транспарту.

Палітвязень Алег Кулеша выйшаў на волю.

50-гадовага пружанца Алега Кулешу асудзілі да 19 месяцаў калоніі па брэсцкай «справе карагодаў». Палітвязня абвінавацілі па ч. 1 арт. 342 КК за падзеі 13 верасня 2020-га на «Маршы герояў» у Брэсце, калі пратэстоўцы на скрыжаванні бульвара Касманаўтаў і праспекта Машэрава вадзілі карагод, спявалі песні і танчылі.

У пачатку лютага Алег даслаў на волю вялікі ліст, у якім распавёў, што адміністрацыя калоніі фактычна забараняе яму размаўляць на беларускай мове. За гэта яго нават выклікалі на размову, падчас якой казалі, што ў папраўчай установе трэба размаўляць выключна па-расійску.

Палітвязень цалкам адбыў тэрмін і выйшаў з бабруйскай калоніі.

Палітвязень Канстанцін Дудзікаў таксама выйшаў на волю.

Канстанціна Дудзікава 18 красавіка замест працы ў ПУАТ №36 адвезлі ў суд. У выніку яму замянілі «хімію» на калонію ўзмоцненага рэжыму. Канстанцін быў асуджаны судом Быхаўскага раёна на 1 год і 6 месяцаў «хіміі» паводле арт. 369 КК за абразу прадстаўніка ўлады.

Тэрмін Канстанцін адбываў у наваполацкай калоніі № 1. 24 верасня Дудзікаў выйшаў на волю па сканчэнні тэрміну.

За час зняволення палітвязень схуднеў на 26 кілаграмаў, а таксама ў яго з’явіліся сур’ёзныя праблемы з зубамі.