«І машыны ў цябе больш няма». «Вясёлыя гісторыі» сілавікоў у новым зліве кіберпартызан

Беларускія кіберпартызаны працягваюць публікаваць запісы гутарак па ўнутранай сувязі МУС, атрыманыя, як яны сцвярджаюць, пасля ўзлому засакрэчаных сервераў, піша «Свабода».

У чарговым роліку, апублікаваным 21 жніўня, гучаць галасы, як сцвярджаюць кіберпартызаны, намесніка начальніка ГУУС Мінгарвыканкама Ігара Падвойскага і першага намесніка начальніка УУС Мінаблвыканкама Віталя Казлова.

Гаворка перасыпаная нецэнзурнай лексікай.

Са словаў ІП вынікае, што ён дужа стаміўся, бо біў раварыстаў («чалавек семдзесят») і затрымліваў аўтамабілістаў, якія сігналілі (верагодна, на знак салідарнасці з пратэстоўцамі).

Ён расказаў суразмоўцу, што калі адна жанчына-аўтамабілістка запатрабавала патлумачыць ёй правы, ён выцягнуў яе за валасы з машыны, ударыў нагой, а потым, калі вялі ў аўтазак, яе ўдарылі галавой. Пасля гэтага іншы пасажыр машыны сам пабег у аўтазак. Гісторыя выклікала смех у суразмоўцаў.

З яго слоў вынікае, што забралі каля дваццаці машын і пераказаў дыялог з кіроўцам. «У чым справа? Сігналіць нельга?» «Нельга. І машыны ў цябе больш няма». Зноў смяюцца.

Трэцяя гісторыя, якая насмяшыла суразмоўцаў — пра тое, як амапаўцы прыехалі затрымліваць «баевікоў з Данбаса», а гэта аказаліся будаўнікі з Іванаўскага раёна, якія «пантаваліся пʼяныя» перад жанчынамі. Адна з жанчын пра іх і расказала сілавікам.

Са словаў ІП вынікае, што ён чамусці ўпэўнены, што размову не праслухоўваюць.

Ён таксама расказаў пра даклад кіраўнікам сілавікоў, які, выглядае, прайшоў не так, як яму хацелася б, і персанальныя размовы з імі, пасля якіх «кашуля была мокрая».

Раней кіберпартызаны апублікавалі аўдыё тэлефонных размоваў, якія меркавана адбываліся паміж прэс-сакратаркай Аляксандра Лукашэнкі Наталляй Эйсмант, камандзірам сталічнага АМАПу Дзмітрыем Балабам і адзінаборцам Дзмітрыем Шакутам. У другім запісе, як сцвярджалі кіберпартызаны, намеснік начальніка міліцыі грамадзкай бяспекі УУС Мінаблвыканкама Мікалай Максімовіч раіў іншаму неназванаму службоўцу лупцаваць усіх, ні на што не зважаючы.